މާލެ ސިޓީއަކީ ކ. މާލެ ކަމަށް ސިފަކުރުމަކީ ގާނޫނު އަސާސީއާ ހިލާފު ވާހަކައެއް ކަމަށް ސިޓީ ތަކާއި ލޯކަލް ގަވަނަންސް މިނިސްޓަރު އާދަމް ޝަރީފް މިއަދު ވިދާޅުވެއްޖެ އެވެ.
އެކްސް (ކުރީގެ ޓްވިޓާ) ގައި މިނިސްޓަރު ކުރެއްވި ޕޯސްޓެއްގައި ވިދާޅުވީ ފަހަކަށް އައިސް ވެރިރަށް ކ(އަތޮޅު) މާލެ ގެ ގޮތުގައި ސިފަކުރުމަކީ އާންމު ކަމަކަށް ވަމުން އަންނަ ކަމަށެވެ. ނަމަވެސް ގާނޫނުއަސާސީގައި ރާއްޖޭގެ ވެރިރަށަކީ މާލެ ކަމަށާއި ކ. މާލެ ނޫން ކަމަށް އޭނާ ވިދާޅުވި އެވެ.
”ސަރުކާރުގެ ރަސްމީ ލިޔުންތަކުގައި ކ. މާލޭގެ ވާހަކައެއް ނެތް. މާލެ އަކީ ކ. އަތޮޅުގައި އޮތް ރަށެއް ނަމަވެސް މާލެއަކީ ރާއްޖޭގެ ވެރިރަށަށް ވާތީ މާލެ އަކީ ކ. މާލެ އޭ ނުކިޔޭ،“ މިނިސްޓަރު ލިޔުއްވާފައިވެ އެވެ.
އަދި ކ. މާލެ ލިޔުމާއި ބުނުމަކީ ގާނޫނު އަސާސީއާ ހިލާފު ކަމެއް ކަމަށް ވިދާޅުވި އެވެ. އަދި މިއީ ކުޑަކަމެއް ނޫން ކަމަށާއި ކ. މާލެ އޭ ބުނުމަކީ ރަނގަޅު ކުރަން ޖެހޭ ކަމެއް ކަމަށް އޭނާ ވިދާޅުވި އެވެ.
ގާނޫނު އަސާސީގެ 14 ވަނަ މާއްދާގައި ބުނަނީ ރާއްޖޭގެ ވެރިކަން ކުރާ ރަށަކީ މާލެ ކަމަށެވެ. އަދި ކ. އަތޮޅަށް ނަން ދީފައިވަނީ ވެސް މާލެ އަތޮޅުގެ ނަމުންނެވެ.