ޒަމާނީ މީސްމީޑިއާގެ ވެށީގައި މިހާރު އެންމެ ބާރަށް ދެކެވެމުން އަންނަ އެއް ވާހަކައަކީ އެކަނިވެރިކަމާއި، ރައްޓެހިންނާ ނުލައި ދިރިއުޅުމުގެ ވާހަކައެވެ. އިޖުތިމާއީ ގުޅުންތަކަށް ވުރެ އަމިއްލަ މިނިވަންކަމާއި ”ސެލްފް ލަވް“ އިސްކުރުމުގެ ނަމުގައި، މީސްމީޑިއާގެ އެކި ޕްލެޓްފޯމުތަކުގައި ބައެއް އިންފްލޫއެންސަރުން ދަނީ އެކަނި ދިރިއުޅުމަކީ ވަރަށް ”ކޫލް“ އަދި މޮޅު ކަމެއްގެ ގޮތުގައި ދައްކުވައިދެމުންނެވެ.
މިގޮތުން ލާނާ އީސާ ފަދަ ”އެކަނިވެރިކަމުގެ އިންފްލޫއެންސަރުން“ (Solitude Influencers) ގެ ވީޑިއޯތަކާއި ޕޯސްޓުތައް މިހާރު ދަނީ އިންޓަނެޓުގައި ވައިރަލްވަމުންނެވެ. މިފަދަ ފަރާތްތަކުން އެމީހުންގެ ދުވަހީ ދިރިއުޅުން ޑޮކިއުމެންޓްކޮށް ދައްކުވައިދެނީ، ގާތް ރައްޓެހިންނާ ނުލައި އެކަނި ދިރިއުޅުމަކީ ބައެއް ފަހަރު އުނދަގޫ ކަމަކަށް ވިޔަސް، އެއީ ކޮންމެހެން މީހާ ހިތްހަމަނުޖެހި، މާޔޫސްވާންޖެހޭ ސަބަބެއް ނޫން ކަމެވެ. އެކަނި ކޮފީއަކަށް ދިއުމާއި، އެކަނި ދަތުރުދިއުމާއި، އެކަނި އިނދެ ވަގުތު ހޭދަކުރުމަކީ އަމިއްލަ ނަފުސު ދެނެގަތުމަށް ލިބޭ ބާރެއްގެ ގޮތުގައި އެމީހުން ސިފަކުރެއެވެ.
ނަމަވެސް، މި ޓްރެންޑާ މެދު ނަފްސާނީ އަދި އިޖުތިމާއީ މާހިރުންގެ ވިސްނުން ވަރަށް ތަފާތެވެ. މާހިރުން ފާހަގަކުރާ ގޮތުގައި ކުޑަ ވަގުތުކޮޅަކަށް އެކަނިވެލައި، އަމިއްލަ ނަފުސަށް ވަގުތު ދިނުމަކީ (Solitude) ފައިދާހުރި ކަމަކަށް ވިޔަސް، ދިގު މުއްދަތަކަށް އެކަހެރިވެ، އިޖުތިމާއީ ގުޅުންތަކުން ދުރުވުމަކީ (Loneliness) ސިއްހަތަށް ނުރައްކާތެރި ކަމެކެވެ. އިންސާނުންނަކީ ތަބީއަތުގައި ވެސް އެކަކު އަނެކަކާ ގުޅިގެން އުޅުމަށް އުފައްދަވާފައިވާ ބައެކެވެ. އިސްލާމީ ރިވެތި އުސޫލުތައް ވެސް ބާރުއަޅަނީ އެކުވެރިކަމާއި، އުޚުއްވަތްތެރިކަމާއި، މުޖުތަމައުގެ ގުޅުންތައް ބަދަހިކުރުމަށެވެ. އެހެންކަމުން މާހިރުން ބުނަނީ، މީސްމީޑިއާއިން ފެންނަ ޒީނަތްތެރި މަންޒަރުތަކަށް ހެއްލި، ރައްޓެހިންނާއި އިޖުތިމާއީ ގުޅުންތައް ކަނޑާލުމަކީ ދިގު މުއްދަތުގައި ނަފްސާނީ ބަލިމަޑުކަމަކަށް މަގުފަހިވެދާނެ ކަމެއް ކަމަށެވެ.
”އާޓިފިޝަލް އިންޓެލިޖެންސް ޑޮކްޓަރ“… އެމެރިކާ މީހުން ސިއްހީ ލަފާ ހޯދުމަށް ޗެޓްބޮޓްތަކަށް އެނބުރެނީ ކީއްވެގެން ހެއްޔެވެ؟
މިއަދުގެ ޓެކްނޮލޮޖީގެ ދުނިޔޭގައި އާޓިފިޝަލް އިންޓެލިޖެންސް (އޭއައި) މިވަނީ ސިއްހީ ދާއިރާއަށް ވެސް އިންގިލާބީ ބަދަލުތަކެއް ގެންނަން ފަށާފައެވެ. އެމެރިކާ ފަދަ ތަރައްގީވެފައިވާ ގައުމުތަކުގައި ވެސް ގިނަ އަދަދެއްގެ މީހުން ޑޮކްޓަރަށް ދެއްކުމުގެ ބަދަލުގައި، ސިއްހީ މައުލޫމާތާއި ލަފާ ހޯދުމަށް އޭއައި ޗެޓްބޮޓްތަކުގެ އެހީތެރިކަން ހޯދަމުންދާކަން ވަނީ ފާހަގަކުރެވިފައެވެ.
ސިއްހީ ޚިދުމަތްތަކުގެ އަގު އިންތިހާއަށް ބޮޑުވުމާއި، ޑޮކްޓަރަކަށް ދެއްކުމަށްޓަކައި އެޕޮއިންޓްމަންޓް ހޯދުމުގައި ގިނަ ވަގުތުތަކެއް ހޭދަވާން ޖެހުން ހިމެނެއެވެ. ޗެޓްޖީޕީޓީ ފަދަ ޗެޓްބޮޓްތަކަކީ އެއްވެސް އަގަކާ ނުލައި، ވަގުތުން ވަގުތަށް ސުވާލުތަކަށް ޖަވާބުދޭ ވަސީލަތްތަކަކަށް ވާތީ، އާދައިގެ ރޯގާއަކުން ފެށިގެން އެކި ކަހަލަ އަލާމާތްތައް ދެނެގަތުމަށް ގިނަ ބަޔަކު މިހާރު މި ޓެކްނޮލޮޖީ އިޚްތިޔާރު ކުރެއެވެ. ނަމަވެސް ސިއްހީ މާހިރުން އަދިވެސް އިރުޝާދު ދެނީ، ޗެޓްބޮޓަކީ އެހީތެރި ވަސީލަތެއް ކަމުގައި ވިޔަސް، އެއީ ހަގީގީ ޑޮކްޓަރެއްގެ ބަދަލުގައި ބޭނުންކުރެވޭނެ އެއްޗެއް ނޫން ކަމަށެވެ.
އަރީން (އެޑީ)