ރާއްޖެއިން އެމްޕޮކްސް ގެ ކޭސްއެއް އަދި ފެނިފައެއް ނުވޭ: އެޗްޕީއޭ

ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނީ މިހާތަނަށް އެމްޕޮކްސް ގެ އެއްވެސް ކޭސްއެއް ފެނިފައި ނުވާ ކަމަށެވެ.

އެ މީހުން މިހެން ބުނެފައި މިވަނީ ހުޅުމާލެއިން މީހަކު އެމްޕޮކްސް އަށް ޕޮސިޓިވްވެފައިވާ ކަމަށް ބުނެ ސޯޝަލް މީޑިއާގައި ދެކެވޭ ވާހަކަތަކަށް ރައްދު ދެއްވަމުންނެވެ. އެޗް.ޕީ.އޭއިން ވަނީ މިއީ ދޮގު ވާހަކަތަކެއް ކަމަށް ބުނެ އެ ވާހަކަތައް ދޮގުކޮށްފައެވެ.

ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން މިދިޔަ މެއި މަހުގެ 14 ވަނަ ދުވަހު ކުރި އިއުލާނެއްގައިވާ ގޮތުން އެފްރިކާގައި އެމްޕޮކްސް ފެތުރުމަކީ މުޅި ދުނިޔެއަށް އޮތް ނުރައްކަލަކަށް ވާއިރު، އޭގެ ފަހުން އިންޑިއާ ފަދަ ދިވެހިން ގިނައިން ދަތުރުކުރާ އޭޝިއާގެ ގައުމުތަކުގައި ވެސް ކޭސްތައް ރެކޯޑް ކުރެވިފައިވެ އެވެ.

އިއްޔެ ޑަބްލިއުއެޗްއޯއިން ވަނީ އެމްޕޮކްސް ޓެސްޓް ކިޓް ރާއްޖެއަށް ހަދިޔާކޮށްފައެވެ.

އެމްޕޮކްސް ދެނެގަތުން

އެމްޕޮކްސް ނަމަކަށް ކިޔާ އެމްޕޮކްސް އަކީ ބަލި ޖެހިފައިވާ ޖަނަވާރުތަކާ ކޮންޓެކްޓްވެގެން އިންސާނުންނަށް ފެތުރޭ ވައިރަހެކެވެ. އިންސާނެއްގެ ހަށިގަނޑަށް މި ވައިރަސް ވަދެއްޖެނަމަ އޭނާގެ ފަރާތުން އެހެން މީހުންނަށް މި ވައިރަސް އާންމުކޮށް ފޯރަނީ އެ މީހަކާ ގައިގޯޅިކޮށް އުޅުމުންނެވެ.

އިންސާނުންގެ ކިބައިން މި ވައިރަސް އެންމެ ފުރަތަމަ ފެނިފައިވަނީ 1970 ވަނަ އަހަރު ޑިމޮކްރެޓިކް ރިޕަބްލިކް އޮފް ކޮންގޯއިންނެވެ. އަލާމާތްތަކުގެ ތެރޭގައި ކެއްސުން، ރިއްސުން އަދި ހަށިގަނޑުގައި ދޮސްލާފައި ހުންނަ ބިހިތަކެއް ނަގަ އެވެ.

ވައިރަސްގެ ދެ ބާވަތެއް ދެނެގަނެވިފައި ވެ އެވެ: ސެންޓްރަލް އެފްރިކާގެ ކޮންގޯ ސަރަހައްދުގައި އާންމުކޮށް ފެތުރެމުންދާ ކްލެޑް 1 އަދި ހުޅަނގު އެފްރިކާގައި ފެތުރެމުންދާ ކްލޭޑް 2 އެވެ. މީގެ ތެރެއިން ނުރައްކާތެރިކަން ބޮޑީ ކްލޭޑް 1 ގަ އެވެ.

2022 ވަނަ އަހަރުގެ މެއި މަހުގެ ތެރޭގައި އެމްޕޮކްސް ދުނިޔޭގެ އެކި ކަންކޮޅުތަކުގައި ރިޕޯޓްކޮށްފައިވާއިރު، މި ބަލި ގިނައިން ޖެހެމުން ދިޔައީ އެއް ޖިންސުން ގުޅުން ހިންގާ ފިރިހެނުންނަށެވެ. އެ މީހުންނަށް ޖެހުނީ ކްލޭޑް 2ބީ ސަބްކްލޭޑް އެވެ. އެފަހަރު މިއީ ދުނިޔެއަށް ނުރައްކާތެރި ބައްޔެއްގެ ގޮތުގައި ޑަބްލިޔުއެޗްއޯ އިން ކަނޑައެޅި އެވެ.

2022 ވަނަ އަހަރުގެ ޖުލައި މަހުން ފެށިގެން 2023 ވަނަ އަހަރުގެ މެއި މަހުގެ ނިޔަލަށް ނުރައްކަލުގެ ހާލަތު ދަމަހައްޓާފައިވީ ނަމަވެސް ކޭސްތައް މަދުވުމާ ގުޅިގެން ވަނީ އުވާލާފައެވެ. ނަމަވެސް އޭގެ ކުރީ އަހަރުގެ ސެޕްޓެމްބަރު މަހުން ފެށިގެން ޑިމޮކްރެޓިކް ރިޕަބްލިކް އޮފް ކޮންގޯގައި 11،000 އަށް ވުރެ ގިނަ މީހުންނަށް ބަލި ޖެހި، 445 މީހުން ވަނީ މަރުވެފަ އެވެ.

މިހާތަނަށް ޑަބްލިއުއެޗްއޯއިން ރިޕޯޓްކޮށްފައިވާ ގޮތުގައި 2024 ވަނަ އަހަރު އެކަނިވެސް 14،000 އަށް ވުރެ ގިނަ މީހުންނަށް ބަލި ޖެހި، 524 މީހުން ވަނީ މަރުވެފަ އެވެ.