މާލޭގައި ބިދޭސީން ގަވާއިދާ ޚިލާފަށް ހިންގާ ތަންތަން ހުއްޓުވުމަށް މާލޭ ސިޓީ ކައުންސިލުން މަސައްކަތް ފަށައިފިއެވެ. އިއްޔެ ކައުންސިލްގެ ކޮމިއުނިޓީ އެންގޭޖުމަންޓް އޮފިސަރުން ވަނީ މާލޭގައި ބިދޭސީން ގަވާއިދާ ޚިލާފަށް ހިންގާ ބައެއް ތަންތަން ހޯދައި، އެ ތަންތަނުގެ މައްސަލަ މޯލްޑިވްސް އިމިގްރޭޝަނަށް ރިޕޯޓްކޮށްފައެވެ.
ކައުންސިލުން ހޯދި ތަންތަނުގެ ތެރޭގައި:
– މއ. އަންނާރުގޭގައި ހުއްދަ ނެތި ކާބޯތަކެތި ވިއްކާ ތަނެއް
– ހުރަވީ ގޯޅިތެރޭގައި ގަވާއިދާ ޚިލާފަށް ގެސްޓް ހައުސް ވިޔަފާރި ކުރާ ތަނެއް
– ސިއްކަ ގޯޅީގައި ހުރި ގެއެއްގައި ހުއްދަ ނެތި ކާބޯތަކެތި ތައްޔާރުކުރާ ބިދޭސީންތަކެއް
މީގެ އިތުރުން، އިމިގްރޭޝަނުން ވެސް 200 އަށް ވުރެ ގިނަ އޮފިސަރުންނާއެކު މާލޭގައި ބޮޑު އޮޕަރޭޝަނެއް ފަށައި، ގިނަ ބަޔަކު ހުއްޓުވާފައިވެއެވެ.
މި ސަރުކާރު ވެރިކަމަށް އައި ފަހުން މިދިޔަ ނުވަ މަސްދުވަހުގެ ތެރޭގައި އެންމެ ބޮޑު އިސްކަމެއް ދީފައިވަނީ ރާއްޖޭގައި ގަވާއިދާ ޚިލާފަށް އުޅޭ ބިދޭސީން އަތުލައިގަތުމަށެވެ. މިދިޔަ އަހަރުގެ ނޮވެމްބަރު 17 އިން މިދިޔަ އާދިއްތަ ދުވަހާ ހަމައަށް 3،000 އަށް ވުރެ ގިނަ ބިދޭސީން ޑީޕޯޓްކޮށް، 200 އަށް ވުރެ ގިނަ ތަންތަން އިމިގްރޭޝަނުން ރެއިޑްކޮށްފައިވެއެވެ.