ރައީސް އޮފީހުން މިއަދު ޕްރޮސެކިއުޓާ ޖެނެރަލް (ޕީޖީ) ގެ މަޤާމަށް ކުރިމަތިލުމުގެ ފުރުޞަތު ހުޅުވާލައިފި އެވެ. މި މަޤާމަށް ކުރިމަތިލުމުގެ ފުރުޞަތު އޮންނާނީ އަންނަ މަހުގެ 11 ވަނަ ދުވަހުގެ ނިޔަލަށެވެ.
ޕީޖީގެ މަޤާމު މިހާރު ވަނީ ހުސްވެފައެވެ. އެއީ އެންމެ ފަހުން އެ މަޤާމުގައި ހުންނެވި ހުސައިން ޝަމީމް މަޤާމުން ވަކިކުރުމަށް ރައްޔިތުންގެ މަޖިލީހުން ފާސްކުރުމާ ގުޅިގެންނެވެ. ޝަމީމް ވަކިކުރުމުގެ ޖަލްސާ ހިނގަމުންދަނިކޮށް އިސްތިއުފާ ދެއްވި ކަމަށް ޕީޖީ އޮފީހުން ބުނި ނަމަވެސް، އިސްތިއުފާގެ ސިޓީ ނުލިބޭ ކަމަށް ބުނެ މަޖިލީހުން ވަނީ އޭނާ މަޤާމުން ވަކިކުރަން ފާސްކޮށްފައެވެ.
ޕީޖީގެ މަޤާމަށް ކުރިމަތިލާ ފަރާތްތަކުގެ ތަޢުލީމީ ޝަރުޠަކީ ޤާނޫނީ ދާއިރާއިން ފުރަތަމަ ޑިގްރީ ހާސިލްކޮށްފައިވުމާއެކު، އެ ދާއިރާގައި މަދުވެގެން ހަތަރު އަހަރުގެ ތަޖުރިބާ ލިބިފައިވުމެވެ.
ޕްރޮސެކިއުޓާ ޖެނެރަލްގެ ޤާނޫނުގައިވާ ގޮތުން، މި މަޤާމު ހުސްވާތާ 30 ދުވަހުގެ ތެރޭގައި އައު ޕީޖީއެއް އައްޔަންކުރަންޖެހެއެވެ. އައު ޕީޖީއެއް އައްޔަންކުރެވެންދެން އެ އޮފީސް ހިންގާނީ ޑެޕިއުޓީ ޕްރޮސެކިއުޓާ ޖެނެރަލެވެ. ޕީޖީގެ މަޤާމަށް މީހަކު އައްޔަންކުރާނީ ރައީސުލްޖުމްހޫރިއްޔާ ހުށަހަޅުއްވާ ނަންތަކަށް ބިނާކޮށް ރައްޔިތުންގެ މަޖިލީހުންނެވެ.