ބޭންކް އޮފް މޯލްޑިވްސްއިން އަތޮޅު ފެރިދޫ އާއި ބޮޑުފޮޅުދޫގައި އޭޓީއެމް ސެންޓަރެއް ހުޅުވައިފިއެވެ.
މި ދެ ރަށުގައި އަލަށް ހުޅުވި އޭޓީއެމް ސެންޓަރުތަކުން 24 ގަޑިއިރު ބޭންކިންގެ ހިދުމަތް ލިބޭނެ ކަމަށާއި އޭގެ ތެރޭގައި ފައިސާ ނެގުމާއި ޑިޕޮސިޓް ކުރުމާއި މަނީ ޓްރާންސްފާ ކުރުން ހިމެނެ އެވެ.
އަލަށް ތައާރަފްކުރި މި ހިދުމަތްތަކާއެކު ބީއެމްއެލް އިން މިހާރު ވަނީ އެ އަތޮޅުގައި ހަ އޭޓީއެމް ސެންޓަރެއް ހިންގަމުންނެވެ. އަތޮޅުގެ މާލީ ބޭނުންތަކަށް އެހީތެރިވުމުގެ ގޮތުން ބީއެމްއެލް އިން ވަނީ 2006 ވަނަ އަހަރުން ފެށިގެން ރަސްދޫގައި ބޭންކިން ބްރާންޗެއް ވެސް ބަލަހައްޓައިފަ އެވެ.
ބީއެމްއެލްގެ ސީއީއޯ މުހައްމަދު ސަހްރީފް ވިދާޅުވީ އެ އަތޮޅުގައި ފުޅާކޮށްފައިވާ އޭޓީއެމްގެ ހިދުމަތާ މެދު ހިތްހަމަޖެހޭ ކަމަށާއި އެކަމުގެ ސަބަބުން ފެރިދޫ އާއި ބޮޑުފޮޅުދޫގެ ރައްޔިތުންނަށް ބޭނުންވާ ޒަރޫރީ ބޭންކިންގެ ހިދުމަތް ލިބިގެންދާނެ ކަމަށެވެ.
”މި އިންވެސްޓްމަންޓާއި ޑިޖިޓަލް ބޭންކިން ފުޅާކުރުމަށް މިހާރު ކުރަމުންދާ އިންވެސްޓްމަންޓްތަކަކީ އަޅުގަނޑުމެން ހިދުމަތް ކުރާ މުޖުތަމައުތަކަށް އެހީތެރިކަން ފޯރުކޮށްދީ އެތެރޭގެ އިގްތިސާދު ހަރުދަނާ ކުރުމަށް ބޭންކުން ދޭ އަހައްމިއްޔަތުކަން ދައްކުވައިދޭ އިންވެސްޓްމަންޓެއް،“ އޭނާ ވިދާޅުވި އެވެ.
ބީއެމްއެލް އިން މިހާރު ރާއްޖޭގެ 20 އަތޮޅެއްގައި 39 ބްރާންޗާއި 91 ސެލްފް ސާވިސް ބޭންކިން ސެންޓަރާއި 144 އޭޓީއެމް އަދި ކޭޝް އެޖެންޓުންގެ އިތުރުން ފުރިހަމަ އޮންލައިން ބޭންކިންގެ ހިދުމަތް ވެސް އަންނަނީ ދެމުންނެވެ.