ހުޅުމާލޭ ދެވަނަ ފިޔަވަހީގައި ސިނާއީ މަސައްކަތްތަކަށް ބޭނުންވާ ބިން ވިއްކުމަށް ބިޑް ޕްރޮސެސްއަކުން އިއުލާނުކޮށްފި އެވެ.
މި ބިންތަކުގެ ތެރޭގައި ހިމެނެނީ 3،689 އަކަފޫޓާއި 3،746 އަކަފޫޓާ ދެމެދުގެ ބިމެކެވެ.
ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ބުނީ މި ގޯތިތައް ދޫކުރާނީ ހުޅުމާލޭ ދެވަނަ ފިޔަވަހީގައި ތަރައްގީކުރާ ”އިންޓަގްރޭޓެޑް ހަބް“ ތަރައްގީ ކުރުމަށް ކަނޑައަޅާފައިވާ ސަރަހައްދުން ކަމަށެވެ.
ބީލަން ހުށަހެޅޭނީ އުމުރުން 18 އަހަރުން މަތީގެ ދިވެހިންނަށެވެ. ބީލަމަށް ޝައުގުވެރިވާ ކުންފުނިތަކަކީ ރާއްޖޭގައި ރަޖިސްޓްރީވެފައިވާ އަދި ހަމައެކަނި ދިވެހިންގެ ހިއްސާ އޮންނަ ކުންފުންޏަކަށް ވާން ޖެހެ އެވެ.
ބިމުގެ ފެށޭ އަގު ކަނޑައަޅާފައިވަނީ އަކަފޫޓަކަށް 7,500 ރުފިޔާއެވެ. އަދި ޝައުޤުވެރިވާ ފަރާތްތަކަށް އެޗްޑީސީގެ އޮންލައިން ޕޯޓަލް މެދުވެރިކޮށް އެޕްލައި ކުރެވޭނެއެވެ.
ވިއްކުމުގެ މަރުޙަލާ އެކުލެވިގެންވަނީ ދެ ބަޔަކަށެވެ. ފުރަތަމަ ބަޔަކީ ޝައުޤުވެރިކަން ފާޅުކުރުމުގެ ލިޔުން (އެކްސްޕްރެޝަން އޮފް އިންޓްރެސްޓް) ހުށަހެޅުމެވެ. އޭގެ ފަހުން، އެއް ގޯއްޗަކަށް އެއް ފަރާތަށްވުރެ ގިނަ ފަރާތުން ޝައުޤުވެރިކަން ފާޅުކޮށްފައިވާނަމަ، ބިޑިންގ މަރުޙަލާއަށް ދެވޭނެއެވެ.