ރައީސުލްޖުމްހޫރިއްޔާ ޑޮކްޓަރ މުޙަންމަދު މުޢިއްޒު، ސްރީލަންކާގެ ޑިމޮކްރެޓިކް ސޯޝަލިސްޓް ރިޕަބްލިކް އޮފް ސްރީލަންކާގެ އިންތިޚާބީ ރައީސް އަނޫރާ ކުމާރަ ޑިސަނަޔަކައަށް މަރުޙަބާ ވިދާޅުވެއްޖެއެވެ.
ސޯޝަލް މީޑިއާ ޕްލެޓްފޯމް އެކްސްގައި ހިއްސާކުރެއްވި ޕޯސްޓެއްގައި ޑރ.މުއިއްޒު ވިދާޅުވީ ރާއްޖެއާއި ސްރީލަންކާއާ ދެމެދު އޮތް ތާރީޚީ ގުޅުން އިތުރަށް ބަދަހިކުރުމަށް އެންމެން ގުޅިގެން މަސައްކަތް ކުރައްވާނެ ކަމަށް އުއްމީދު ކުރައްވާ ކަމަށެވެ. މުޢިއްޒު ވަނީ މި ކާމިޔާބީ ފާހަގަކުރައްވަމުން އިންތިޚާބީ ރައީސް ޑިސަނަޔަކަގެ އާ ދައުރަށް ކާމިޔާބީއަށް އެދިވަޑައިގެންފައެވެ.
މި އިންތިޚާބަކީ ސްރީލަންކާ އިޤްތިޞާދީ ބޮޑު ކާރިސާއެއްގެ ތެރެއަށް ވެއްޓުނު ފަހުން ބާއްވާ ފުރަތަމަ އިންތިޚާބެވެ. ނޭޝަނަލް ޕީޕަލްސް ޕަވާ (އެންޕީޕީ) ކޯލިޝަންގެ ޓިކެޓުގައި އަނޫރާ، 55، ކާމިޔާބު ކުރެއްވީ 55.89 އިންސައްތަ އަށް ވުރެ ގިނަ ވޯޓު ހޯއްދަވައިގެންނެވެ.
ރިޔާސީ އިންތިހާބުގައި އެންމެ ވަރުގަދަ ކެންޑިޑޭޓުންނަކީ ސިޔާސީ ގޮތުން ވަރުގަދަ އާއިލާތަކަށް ނިސްބަތްވާ ކެންޑިޑޭޓުންނެވެ. ނަމަވެސް މީގެ ކުރިން މަގްބޫލުކަން ކުޑަ ކެނޑިޑޭޓަކަށް ވީ ނަމަވެސް މިފަހަރު ކުއްލިއަކަށް މަގްބޫލުކަން ލިބުނީ ކޮރަޕްޝަނާ ދެކޮޅަށް ވަރުގަދަ ކެމްޕޭން ވާހަކަދައްކައި ފަގީރުންގެ ވެލްފެއާ ރަނގަޅު ކުރާނެ ކަމުގެ ވައުދުތަކާ އެކު އެވެ.
އިންޓަނޭޝަނަލް މަނިޓަރީ ފަންޑް (އައިއެމްއެފް)ގެ އެހީ ހޯދުމަށް ގައުމަށް ގެނައި ބޮޑެތި ބަދަލުތަކާ ދެކޮޅު ކަމަށާއި ވެރިކަމަށް ވަޑައިގެންފިނަމަ ޓެކްސް ކުޑަކޮށް ރައްޔިތުންގެ ދިރިއުޅުމަށް ލުއި ގޮތްތަކެއް ހޯދައިދެއްވާނެ ކަމަށް އޭނާ ވަނީ ވިދާޅުވެފަ އެވެ.
ނޫސްވެރިޔާ