ސްމޯލް އައިލެންޑް ޑިވެލޮޕިންގ ސްޓޭޓްސް (ސިޑްސް) އަށް ދަރަނި މެނޭޖްކުރުމުގައި ދިމާވާ ދަތިތަކުގެ މައްޗަށް އަލިއަޅުއްވާލައްވައި، މި ގޮންޖެހުންތަކުން އަރައިގަތުމަށްޓަކައި ދަރަނި ލުއިކުރުމާއި ކްލައިމެޓް ފައިނޭންސްއާ ދެމެދު އޮންނަ ގުޅުން އިތުރަށް ބަދަހިކުރުމަށް ބައިނަލްއަޤްވާމީ މުޖުތަމަޢަށް ރައީސުލްޖުމްހޫރިއްޔާ ޑޮކްޓަރ މުޙަންމަދު މުޢިއްޒު ގޮވާލައްވައިފިއެވެ.
ނިއުޔޯކުގައި އިއްޔެ ބޭއްވި ބިލްޑިންގ ރެޒިލިއަންޓް ފިއުޗަރސް: ދަ ގްލޯބަލް ސިޑްސް ޑެޓް ސަސްޓެއިނަބިލިޓީ ސަޕޯޓް ސަރވިސްގެ ނަމުގައި އދ.ގެ ޖެނެރަލް އެސެމްބްލީގެ ސައިޑް އިވެންޓްގައި ރައީސުލްޖުމްހޫރިއްޔާ ވަނީ ސިޑްސް ޑެޓް ސަސްޓެއިނަބިލިޓީ ސަޕޯޓް ސަރވިސްގެ ސްޓްރެޓެޖިކް އެޑްވައިޒަރީ ގްރޫޕްގެ ރިޔާސަތު ބަލަހައްޓަވާފައެވެ. އެތަނުގައި ވާހަކަ ދައްކަވަމުން އޭނާ ވަނީ ސިޑްސްގެ ނާޒުކުކަމާއި ދަރަނި ދެމެހެއްޓެނިވި ގޮތެއްގައި ދެމެހެއްޓުމަށް ކުރާ މަސައްކަތްފާހަގަކުރައްވާފައެވެ.
ރައީސް މުއިއްޒު ލަފާ ދެއްވީ ޑީއެސްއެސްއެސްއިން އިންޓްރެސްޓް ރޭޓް ދަށްވުމާއި ލޯނު ދެއްކުމުގެ މުއްދަތު އިތުރުކުރުން ފަދަ ދަރަންޏަށް ލުޔެއް ހޯދައިދިނުމަށް އިސްކަން ދިނުމަށެވެ.
އަދި މަލްޓިލޭޓަރަލް ޑިވެލޮޕްމަންޓް ބޭންކްތަކާއި އިންޓަނޭޝަނަލް ފައިނޭންޝަލް އިންސްޓިޓިއުޝަންސް (އައިއެފްއައި) އާ އެކު ޕާޓްނާޝިޕްގެ ސަބަބުން އާ އިންވެސްޓްމަންޓްތަކާއި އެހެނިހެން އިގްތިސާދީ ފުރުސަތުތައް ހޯދުމުގެ މަގު ފަހިވެގެންދާނެ ކަމަށް ލަފާ ދެއްވި އެވެ.
އިޤްތިޞާދު ޑައިވަރސިފިކޭޝަނަކީ ވަރަށް މުހިންމު ކަމެއް ކަމަށާއި، ސަރުކާރުތަކާއި ޕްރައިވެޓް ސެކްޓަރގެ މެދުގައި ގުޅުން ބަދަހިކުރުމަށް ސިޑްސްއިން ލަފާދެއްވާކަމުގައި ރައީސުލްޖުމްހޫރިއްޔާ ވިދާޅުވިއެވެ.
ރައީސް މުއިއްޒު ވިދާޅުވީ ސިޑްސްގެ ތެރޭގައި ހިމެނޭ 40 އިންސައްތަ ރަށްރަށަށް ދަރަނީގެ ސަބަބުން ގޮންޖެހުންތަކެއް ކުރިމަތިވެފައިވާ ކަމަށެވެ.
ދައުލަތުގެ ބަޖެޓުގައިވާ ގޮތުން މި އަހަރު ނިމޭއިރު ރާއްޖޭގެ ޖުމްލަ ދަރަނި 129 ބިލިއަން ރުފިޔާއަށް އަރާނެ އެވެ.
ނޫސްވެރިޔާ