މިފަހަކަށް އައިސް މަގުމަތީގެ އެކްސިޑެންޓްތައް އިތުރުވަމުންދާތީ ފުލުހުން ވަނީ ހާއްސަ އޮޕަރޭޝަނެއް ފަށައިފަ އެވެ.
ފުލުހުން ސޯޝަލް މީޑިއާގައި ކުރި ޕޯސްޓެއްގައި ބުނީ މި ހާއްސަ އޮޕަރޭޝަންގެ ދަށުން މާލެ އާއި ހުޅުމާލޭގައި ވެހިކަލް ޗެކްޕޮއިންޓްތައް ގާއިމްކޮށް ވެހިކަލްތަކާއި ޑްރައިވަރުން ހުއްޓުވައި ޗެކް ކުރަމުން އަންނަ ކަމަށެވެ. އަދި މަގުމަތީގެ ސަލާމަތާއި ރައްކާތެރިކަމަށް ހޭލުންތެރިކަން އިތުރުކުރުމުގެ މަސައްކަތް ކުރަމުންދާ ކަމަށްވެސް އެ ފަރާތްތަކުން ބުނެއެވެ.
”ވެހިކަލް ބޭނުންކުރުމުގެ ކުރިން ރައްކާތެރިކަމުގެ ގޮތުން އަޅަންޖެހޭ ހުރިހާ ފިޔަވަޅެއް އަޅާފައިވާކަން ކަށަވަރުކުރަން،“ ފުލުހުން ވަނީ އިލްތިމާސްކޮށްފަ އެވެ.
ފާއިތުވި ހަފުތާގައި މަގުމަތީގެ އެކްސިޑެންޓްތައް ވަނީ ވަރަށް ބޮޑަށް އިތުރުވެފަ އެވެ. މާލެ އާއި ހުދުމާލެގައި ހިނގި އެކްސިޑެންޓްތަކުގައި ދެ ޒުވާނަކު ނިޔާވެފައިވާއިރު، ރޭ ހިނގި އެކްސިޑެންޓެއްގައި އިތުރު ތިން މީހަކަށް އަނިޔާވެއްޖެ އެވެ.
ފުލުހުންގެ ރަސްމީ ވެބްސައިޓްގައި ހިއްސާކޮށްފައިވާ ތަފާސް ހިސާބުތައް ދައްކާ ގޮތުން މިއަހަރުގެ މިހާތަނަށް 1900 އެކްސިޑެންޓް ވަނީ ރެކޯޑްކޮށްފައެވެ. މިއީ މިދިޔަ އަހަރުގެ ތަފާސް ހިސާބުތަކަށް ބަލާއިރު ފާހަގަކޮށްލެވޭ އަދަދަކަށް އިތުރު އަދަދެކެވެ. މިދިޔަ އަހަރުގެ އެކްސިޑެންޓްތަކުގައި 125 މީހަކަށް އެކިވަރުގެ އަނިޔާލިބިފައިވާއިރު، އަނިޔާގެ ސަބަބުން ފަސް މީހަކު ވަނީ މަރުވެފައެވެ.
މިއަހަރުގެ މާޗް މަހު އެންމެ ގިނަ އެކްސިޑެންޓް ހިނގާފައިވާއިރު އެ އަދަދު ވަނީ 300 އަށް އަރާފައެވެ. އެހެން މަސްތަކުގައި އެވްރެޖްކޮށް 200 އަށް ވުރެ ގިނަ އެކްސިޑެންޓް ހިނގާކަމަށް ދައްކައެވެ.