ފިނޭންސް މިނިސްޓްރީން އެކުލަވާލާފައިވާ ފިސްކަލް ސްޓްރެޓެޖީ ރިޕޯޓުގައި ސަރުކާރު މުވައްޒަފުންގެ މުސާރަ ބޮޑުކުރުމަށް ހިމަނާފައިވާ ކަމަށް އެ މިނިސްޓްރީން މަޢުލޫމާތު ދީފިއެވެ.
ނަމަވެސް، އަންނަ އަހަރުގެ ދައުލަތުގެ ބަޖެޓުގައި މުސާރަ ބޮޑުކުރުމަށް ފައިސާ ހިމަނާނެކަން އަދި ޔަޤީންވެފައެއް ނުވެއެވެ. ސިވިލް ސާވިސްގައި މިހާރު މަސައްކަތްކުރާ 30،165 މުވައްޒަފުންގެ މުސާރަ ބޮޑުކުރުމަށް މަދުވެގެން 1 ބިލިއަން ރުފިޔާ ބޭނުންވާނެ ކަމަށް ލަފާކުރެވެއެވެ.
ދައުލަތުގެ މުސާރަތަކުގައި ހުރި ފަރަގުތައް ނައްތާލައި މުސާރަތައް އެއްހަމަކުރުމުގެ މަސައްކަތް ފެށީ 2022 ވަނަ އަހަރުއެވެ. މި މަސައްކަތުގެ ދަށުން މިއަހަރުގެ ބަޖެޓުގައި މުސާރަތައް އެއްހަމަކުރުމަށް 500 މިލިއަން ރުފިޔާ އިތުރަށް ހިމެނިފައިވެއެވެ. މީގެ އިތުރުން، ރައީސް އިބްރާހީމް މުޙައްމަދު ޞާލިޙްގެ ވެރިކަމުގައި ތަޢުލީމީ ދާއިރާ، ޞިއްޙީ ދާއިރާ އަދި ފުލުހުންނާއި ސިފައިންގެ މުސާރަ ވަނީ ބޮޑުކޮށްފައެވެ.
ދައުލަތުގެ މިއަހަރުގެ ބަޖެޓުގެ 25 އިންސައްތަ (12 ބިލިއަން ރުފިޔާ) އަކީ މުސާރަ ދިނުމަށް ހިމަނާފައިވާ ފައިސާއެވެ. ސަރުކާރުން އަމާޒު ހިފާފައިވަނީ 2026 ވަނަ އަހަރު ދައުލަތުގެ ހުރިހާ މުވައްޒަފުންގެ މުސާރަ އެއްހަމަކޮށް ނިންމުމަށެވެ.
އެހެންނަމަވެސް، މުސާރަ ބޮޑުކުރުމުގެ މަސައްކަތް ކުރިއަށްދާއިރު، ރާއްޖޭގެ އިޤްތިޞާދު އޮތީ ނުރައްކާތެރި ފައްތަރެއްގައެވެ. ޚާއްޞަކޮށް ލިބޭ އާމްދަނީއަށްވުރެ ކުރަންޖެހޭ ޚަރަދުތައް އެތައް ގުނައެއް ބޮޑުވުމާ ގުޅިގެން، ދައުލަތަށް ދަރަނިތައް ނުދެއްކިދާނެ ކަމުގެ ބިރުވެރިކަން އުފެދިފައިވާކަން ފާހަގަކުރެވެއެވެ.