ވިލިމާލެ ހޮސްޕިޓަލްގެ މަސައްކަތްތައް އެހެން ތަނަކަށް ބަދަލުކުރުމަށް ނިންމާފައިވާ ކަމަށް މާލޭ ގްރޫޕް އޮފް ހޮސްޕިޓަލްސްއިން ހާމަކޮށްފިއެވެ. މިގޮތަށް ނިންމާފައިވަނީ ވިލިމާލެ ހޮސްޕިޓަލް ހުރި ތަނުގައި 100 އެނދުގެ ޓާޝަރީ ހޮސްޕިޓަލެއް އެޅުމުގެ އަމަލީ މަސައްކަތް ފެށުމަށް ތައްޔާރުވަމުންދާތީއެވެ.
މާލޭ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހިމް އަބްދުލްރައްޒާގް ހަލީމް، ރައްޔިތުންގެ މަޖިލީހުގެ އިޖުތިމާއީ ކޮމިޓީގައި މިއަދު ވާހަކަދައްކަވަމުން ވިދާޅުވީ، ވިލިމާލޭގައި 100 އެނދުގެ ހޮސްޕިޓަލް އެޅުމަށް އެންމެ ރަނގަޅު ބިމަކީ މިހާރުވެސް ހޮސްޕިޓަލް ހުރި ބިން ކަމަށެވެ. އެހެންކަމުން، އާ ހޮސްޕިޓަލް އެޅުމުގެ މަސައްކަތް ފެށޭނީ ބިން ހުސްކޮށްގެން ކަމަށްވާތީ، އެ މަސައްކަތް ކަމާ ގުޅޭ އިދާރާތަކާ ގުޅިގެން ކުރިއަށްދާ ކަމަށް އޭނާ ވިދާޅުވިއެވެ.
”ހޮސްޕިޓަލް އެޅުމުގެ މަސައްކަތް ކުރިއަށްދާއިރު ވިލިމާލެއިން ސިއްހީ ހިދުމަތް މެދުނުކެނޑޭ ގޮތަށް އިންތިޒާމުތައް ހަމަޖައްސާނަން. އެހެން ތަނަކަށް މިހާރު ހުރި ސެޓަޕް ބަދަލުކުރުމުގެ މަސައްކަތް މިހާރު މިވަނީ ރާވާފައި,“ އަބްދުއްރައްޒާގް ވިދާޅުވިއެވެ.
ވިލިމާލޭގެ ޓާޝާރީ ހޮސްޕިޓަލްގެ ފީސިބިލިޓީ ހެދުމަށް ޗައިނާ ސަރުކާރުން ހަވާލުކޮށްފައިވަނީ ޗައިނާ އިންޓަނޭޝަނަލް ޑިވެލޮޕްމަންޓް ކޯޕަރޭޝަން އެޖެންސީއަށެވެ. މި މަސައްކަތަކީ ޗައިނާ ސަރުކާރުން ހިލޭ ކޮށްދޭ ކަމެކެވެ.
ހެލްތު މިނިސްޓަރު ޑރ. އަބްދުﷲ ހަލީލް މީގެކުރިން ވިދާޅުވެފައިވަނީ އާ ހޮސްޕިޓަލާ އެކު މާލެ ސަރަހައްދުގެ ސިއްހީ ހިދުމަތްތަކަށް ރަނގަޅު ހެޔޮ ބަދަލުތަކެއް އައިސް އާ ހިދުމަތްތައް ފެށިގެންދާނެ ކަމަށެވެ. އޭގެ ތެރޭގައި ޗެރިޓީ ކެއާ ސެންޓަރެއް، ޑިކޮމްޕްރެޝަން ޗެމްބަރެއް އަދި ތިމާވެއްޓާ ރައްޓެހި ޑިޒައިނެއް ހިމެނޭނެ ކަމަށް މިނިސްޓަރު ހަލީލް ވިދާޅުވިއެވެ.
”އެހެންވީމާ އެނާޖީ ކޮންސަމްޝަން ތަފާތު ވާނެ. މިތަނުގެ ބައެއް ޑިޒައިންގައި ތަފާތު ހުންނާނެ. ބޭނުންކުރާ ބައެއް އާލާތްތަކުގައި ތަފާތު ހުންނާނެ އާންމުކޮށް އެހެން ހޮސްޕިޓަލްތަކާ. އެހެންވީމާ އެ ހުރިހާ ގޮތަކުން ބަލާއިރުވެސް ވަރަށް ތަފާތު ވިސްނުންތަކެއްގެ މައްޗަށް ބިނާވެގެން ބިނާކުރެވޭ ހޮސްޕިޓަލަކަށް މި ހޮސްޕިޓަލް ވެގެންދާނެ,“ ހަލީލް ވިދާޅުވިއެވެ.
މިނިސްޓަރު އިތުރަށް ވިދާޅުވީ، އާ ހޮސްޕިޓަލް ނިމުމުން އެތަނުގައި ދޮށީ އުމުރުގެ މީހުންނަށް ޚާއްޞަ ޚިދުމަތްތަކެއް ލިބެން ހުންނާނެ ކަމަށެވެ. އޭގެ ތެރޭގައި ދޮށީ އުމުރުގެ މީހުން އެ ތަނުގައި ދުވަސްކޮޅަކަށް ބައިތިއްބައިގެން އެމީހުންނަށް ދޭންޖެހޭ ފަރުވާ ދިނުން ހިމެނެއެވެ. އަދި ޑައިވިންގ ކުރާ މީހުންނަށް ދިމާވާ ސިއްހީ މައްސަލަތަކަށް ފަރުވާ ދިނުމަށް ޑިކޮމްޕްރެޝަން ޗެމްބަރެއްވެސް އެ ހޮސްޕިޓަލްގައި ގާއިމުކުރުމަށް ނިންމާފައިވާ ކަމަށް މިނިސްޓަރު ހަލީލް ވިދާޅުވިއެވެ.
މި މަޝްރޫޢުގެ ސަބަބުން ވިލިމާލޭގެ ސިއްހީ ޚިދުމަތްތައް ވަގުތީގޮތުން އެހެން ތަނަކަށް ބަދަލުކުރަން ޖެހުނު ނަމަވެސް، ދިގު މުއްދަތުގައި މާލެ ސަރަހައްދުގެ ސިއްހީ ޚިދުމަތްތައް އިތުރަށް ފުޅާވެ، ރައްޔިތުންނަށް ލިބޭ ޚިދުމަތުގެ ފެންވަރު މަތިވެގެންދާނެ ކަމަށް ބެލެވެއެވެ.
ނޫސްވެރިޔާ