މޫސުމާބެހޭ ޤައުމީ މަރުކަޒު (މެޓް އޮފީސް)އިން މިއަދު ހާމަކުރި ގޮތުގައި، ދިވެހިރާއްޖޭގެ އެންމެހައި އަތޮޅުތަކުގައި ވައިގެ ބާރު މަޑުޖެހެމުންދާކަން ފާހަގަކުރެވެއެވެ. މި މަޢުލޫމާތު ’ސަން‘ ނޫހާ ހިއްސާކުރަމުން، މެޓް އޮފީހުގެ ބަސްބުނާ ފަރާތަކުން ވިދާޅުވީ މުޅި ރާއްޖޭގެ މޫސުން މިހާރު ރަނގަޅުވަމުން އަންނަ ކަމަށެވެ.
”އުތުރުގެ އަތޮޅުތަކުގައި މިއަދު ކޮންމެވެސް ވަރަކަށް ވައިގަދަވިނަމަވެސް، ކުރިއަށް އޮތް ގަޑިތަކުގައި ވައިގެ ބާރު މަޑުޖެހޭނެކަމަށް އަޅުގަނޑުމެން ލަފާކުރަން,“ އެ އޮފިޝަލް ވިދާޅުވިއެވެ.
މީގެއިތުރުން، ވައިގެ ބާރު މަޑުޖެހެން ފެށުމާއެކު، ކަނޑުގެ އޮއިވަރުތައްވެސް މަޑުޖެހެމުންދާކަމަށް އެ މަރުކަޒުން ފާހަގަކޮށްފައިވެއެވެ.
ފާހަގަކޮށްލެވޭ ގޮތުގައި، އުތުރުގެ އަތޮޅުތަކަށް ބޯކޮށް ވާރޭވެހުމުގެ ފުރުސަތު އޮތްކަމަށް ލަފާކުރެވޭތީ، މެޓް އޮފީހުން ރޭގެ 01:00 އިން މިއަދު ހެނދުނު 07:00 އާ ހަމައަށް ހުދު ސަމާލުކަމުގެ އިންޒާރެއް ނެރެފައިވެއެވެ. މި އިންޒާރާ ގުޅިގެން، ރޭގެ ވިއްސާރައިގައި ކުޅުދުއްފުށި ސިޓީގައި ފެންބޮޑުވެ، 57 ގޭބިސީއަށް ފެންވަދެ، އެކި މިންވަރުގެ ގެއްލުންތަކެއް ލިބިފައިވާކަން ރިޕޯޓުކުރެވިފައިވެއެވެ.
މެޓް އޮފީހުން ކުރިން ދީފައިވާ މަޢުލޫމާތުގައިވާ ގޮތުން، މިވަގުތު ރާއްޖެއަށް ކުރަމުންދަނީ ހުޅަނގު މޫސުމުގެ ވިއްސާރަކަމަށާއި، މި މޫސުން ޑިސެންބަރު މަހާ ހަމައަށް ދެމިގެންދާނެކަމަށް ލަފާކުރެވެއެވެ.
ނޫސްވެރިޔާ