މާލެ ސިޓީގައި ފެންބޮޑުވެ، ގިނަ ގެތަކަށް ގެއްލުން ލިބިފައިވާ ވަގުތެއްގައި، މޫސުމާބެހޭ އިދާރާއިން ވަނީ ނުރައްކާތެރި މޫސުމުގެ އިންޒާރު ދީފައެވެ.
އަންގާރަ ދުވަހު ވިއްސާރައިގެ ސަބަބުން މަދުވެގެން 70 ގެއަށް ފެންބޮޑުވެ ގެއްލުން ލިބުނެވެ. މިކަމާ ގުޅިގެން ނެޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން ވަނީ ގެތަކުން ފެން ހިއްކައި، ގޯނި އަޅައިގެން ފެން ވަނުން ހުއްޓުވުމުގެ މަސައްކަތް ފަށާފައެވެ. މި މަސައްކަތުގައި މާލޭ ސިޓީ ކައުންސިލާއި، އެމްއެންޑީއެފް، ސްޓެލްކޯ އަދި އެމްޓީސީސީއާ ގުޅިގެން ޙަރަކާތްތެރިވަމުންދެއެވެ.
މޯލްޑިވްސް މީޓިއޮރޮލޮޖިކަލް ސަރވިސްއިން ވަނީ މެދުރާއްޖެއަށް އޮރެންޖް އެލާޓެއް ނެރެ، ކ. އަތޮޅުން އއ. އަތޮޅާ ހަމައަށް ވިއްސާރައާއި ގުގުރުމާއެކު ވާރޭވެހުމުގެ އިންޒާރު ދީފައެވެ. އަދި ދެކުނު ރާއްޖެއަށް ޔެލޯ އެލާޓެއް ނެރެ، ގއ. އަތޮޅުން އައްޑޫ ސިޓީއާ ހަމައަށް ވިއްސާރައާއި ގުގުރުމާއެކު ވާރޭވެހި، ގަޑިއަކު 45 މޭލުގެ ބާރުމިނުގައި ވައިޖެހުމުގެ އިންޒާރު ދީފައިވެއެވެ.
ކުރިއަށް އޮތް ފަސް ދުވަހު ރާއްޖޭގެ ގިނަ ސަރަޙައްދުތަކަށް ވިއްސާރައާއި ގުގުރުމާއެކު ވާރޭވެހުން އެކަށީގެންވާ ކަމަށް ބުނެ، އެންޑީއެމްއޭއިން ވަނީ އާންމުންނަށް ސަމާލުވުމަށް އިރުޝާދު ދީފައެވެ. މީގެ ތެރޭގައި ފެންބޮޑުވުމަށް ތައްޔާރުވުމާއި، ގޯނި އަޅައިގެން ފެން ވަނުން ހުއްޓުވުމާއި، އަގުބޮޑު ތަކެތި މަތީ ތަންތަނަށް ބަދަލުކުރުން ހިމެނެއެވެ.