ފައިނޭންޝަލް ޓެކްނޮލޮޖީ (ނުވަތަ ފިންޓެކް ގެ ނަމުން މަޝްހޫރު) އަކީ މާލީ ޚިދުމަތްތައް ފޯރުކޮށްދިނުމާއި ބޭނުންކުރުން ރަނގަޅުކޮށް އޮޓޮމޭޓްކުރުމަށް ބޭނުންކުރެވޭ އައު ޓެކްނޮލޮޖީއެވެ. މައިގަނޑު ގޮތެއްގައި، ފިންޓެކް ބޭނުންކުރެވެނީ ކުންފުނިތަކާއި، ވިޔަފާރިވެރިންނާއި އަދި ޢާންމު ފަރުދުންނަށް އެމީހުންގެ މާލީ މުޢާމަލާތްތަކާއި، ޕްރޮސެސްތަކާއި އަދި ދިރިއުޅުން ބެލެހެއްޓުމަށް އެހީތެރިވުމަށެވެ. މިއީ ކޮމްޕިއުޓަރުތަކާއި ސްމާޓްފޯނުތަކުގައި ބޭނުންކުރެވޭ ޚާއްޞަ ސޮފްޓްވެއަރތަކާއި އެލްގޮރިދަމްތަކުން އެކުލެވިގެންވާ އެއްޗެކެވެ. ”ފިންޓެކް“ މި ބަހަކީ ”ފައިނޭންޝަލް ޓެކްނޮލޮޖީ“ ގެ ކުރުކޮށްލެވިފައިވާ ގޮތެވެ.
21 ވަނަ ޤަރުނުގައި ފިންޓެކް އުފެދުނު އިރު، މި ބަސް ބޭނުންކުރެވުނީ މައިގަނޑު ގޮތެއްގައި ބޭންކުތަކުގެ ފަދަ މާލީ މުއައްސަސާތަކުގެ އެތެރޭގެ ނިޒާމުތަކުގައި ބޭނުންކުރެވޭ ޓެކްނޮލޮޖީއަށެވެ. 2018 ވަނަ އަހަރުން ފެށިގެން 2022 އާ ހަމައަށް، މި ދާއިރާ ކަސްޓަމަރުންނަށް އަމާޒުކުރެވިފައިވާ ޚިދުމަތްތަކަށް ބަދަލުވިއެވެ. މިހާރު ފިންޓެކްގެ ތެރޭގައި ތަޢުލީމު، ރީޓެއިލް ބޭންކިންގ، ފަންޑު އެއްކުރުމާއި ނަފާ ނުލިބޭ ޖަމްޢިއްޔާތައް، އަދި އިންވެސްޓްމަންޓް މެނޭޖްމަންޓް ފަދަ އެކި ދާއިރާތައް ހިމެނެއެވެ.
ފިންޓެކްގެ ތެރޭގައި ބިޓްކޮއިން ފަދަ ކްރިޕްޓޯކަރަންސީތައް ތަރައްޤީކޮށް ބޭނުންކުރުންވެސް ހިމެނެއެވެ. ފިންޓެކްގެ މި ބައި އެންމެ ގިނައިން ޚަބަރުތަކުގައި ފެނުނު ނަމަވެސް، އެންމެ ބޮޑު ފައިސާގެ މުޢާމަލާތްތައް ހިނގަނީ އަދިވެސް ޓްރިލިއަން ޑޮލަރުގެ މާކެޓް ކެޕިޓަލައިޒޭޝަނެއް އޮންނަ ބައިނަލްއަޤްވާމީ ބޭންކިންގ ދާއިރާގައެވެ.
މުހިންމު ނުކުތާތައް:
- ފިންޓެކް މާނަކުރެވެނީ މާލީ ޚިދުމަތްދޭ ކުންފުނިތަކުން އެމީހުންގެ ޚިދުމަތްތައް ބޭނުންކުރާ ގޮތާއި ކަސްޓަމަރުންނަށް ފޯރުކޮށްދޭ ގޮތް ރަނގަޅުކުރުމަށް ޓެކްނޮލޮޖީ ބޭނުންކުރުމެވެ.
- މައިގަނޑު ގޮތެއްގައި މިކަން ކުރެވެނީ މިފަދަ ކުންފުނިތަކުން ދޭ ޚިދުމަތްތައް ވަކިވަކިން ބަހާލައި، އެ ޚިދުމަތްތަކަށް އައު މާކެޓްތައް އުފެއްދުމުންނެވެ.
- މާލީ ދާއިރާގައި ފިންޓެކް ބޭނުންކުރާ ކުންފުނިތަކުން މާލީ ޚިދުމަތްތައް އިތުރު ބަޔަކަށް ފޯރުކޮށްދީ، ހިންގުމުގެ ޚަރަދުތައް ކުޑަކުރުމަށް ޓެކްނޮލޮޖީ ބޭނުންކުރެއެވެ.
- ފިންޓެކްއަށް ކުރެވޭ އިންވެސްޓްމަންޓް އިތުރުވަމުން އަންނަ ނަމަވެސް، ޤާނޫނީ ގޮތުން ދަތިތަކެއް ހުރެއެވެ.
- ފިންޓެކް އެޕްލިކޭޝަންތަކުގެ މިސާލުތަކުގެ ތެރޭގައި ރޮބޯ-އެޑްވައިޒަރުން، ފައިސާ ދެއްކުމުގެ އެޕްތައް، ޕިއަރ-ޓު-ޕިއަރ (ޕީ2ޕީ) ލޯނު ދޫކުރުމުގެ އެޕްތައް، އިންވެސްޓްމަންޓް އެޕްތައް، އަދި ކްރިޕްޓޯ އެޕްތައް ހިމެނެއެވެ.
ފުޅާ މާނައެއްގައި، ”ފައިނޭންޝަލް ޓެކްނޮލޮޖީ“ މި ބަހުގެ މާނައަކީ ވިޔަފާރި މުޢާމަލާތްތައް ކުރުމުގައި ގެނެވޭ ކޮންމެ އައު ގޮތަކަށްވެސް ނިސްބަތްކުރެވިދާނެއެވެ. މިސާލަކަށް ޑިޖިޓަލް ފައިސާ އުފެއްދުމުން ފެށިގެން ޑަބަލް-އެންޓްރީ ބުކްކީޕިންގ އާ ހަމައަށެވެ. އިންޓަރނެޓްގެ އިންޤިލާބަށްފަހު، ފައިނޭންޝަލް ޓެކްނޮލޮޖީ ވަނީ ހައިރާންވާފަދަ ބާރުމިނެއްގައި ކުރިއަރައިގޮސްފައެވެ.
ޝިނާ