ބޮކްސް އޮފީހުގެ އެންމެ ކުރީގައި އުޅޭ ފިލްމުތަކުގެ ވާދަވެރިކަން ބޮޑުވެފައިވާއިރު، އަލަށް ރިލީޒްކުރި ”ސްކޭރީ މޫވީ“ ފްރެންޗައިޒްގެ ހަވަނަ ފިލްމު ބޮޑު ކާމިޔާބީއަކާއެކު ތާވަލުގެ އެއްވަނަ ހޯދައިފިއެވެ.
ޕެރަމައުންޓް އާއި މިރަމެކްސް ގުޅިގެން އުފައްދާފައިވާ ”ސްކޭރީ މޫވީ“ އަށް ފުރަތަމަ ހަފުތާ ބަންދުގައި އެކަނިވެސް 55 މިލިއަން ޑޮލަރުގެ ޓިކެޓް ވަނީ ވިއްކާފައެވެ. މައިކަލް ޓިޑެސް ޑައިރެކްޓްކޮށްފައިވާ މި ފިލްމަކީ ކުރީގެ ތަރިން ކަމަށްވާ އަނާ ފާރިސް އާއި ރެޖީނާ ހޯލް ފެނިގެންދާ، ބިރުވެރި ފިލްމުތަކާއި މަޝްހޫރު ސަގާފީ ހާދިސާތަކަށް އަމާޒުކޮށް އުފައްދާފައިވާ ”އާރް ރޭޓެޑް“ ކޮމެޑީއެކެވެ. އެމެރިކާގެ ބާޒާރުގެ އިތުރުން ދުނިޔޭގެ އެކި ކަންކޮޅުތަކުން މި ފިލްމަށް ވަނީ 50.5 މިލިއަން ޑޮލަރު ލިބިފައެވެ.
ބޮކްސް އޮފީހުގެ ދެވަނަ އަށް އައީ މިދިޔަ ހަފުތާގައި ރިލީޒްކުރި އެމެޒޯން އާއި މެޓެލް ފިލްމްސްގެ ”މާސްޓާސް އޮފް ދަ ޔުނިވާސް“ އެވެ. މި ފިލްމަށް ލިބިފައިވަނީ 29.3 މިލިއަން ޑޮލަރެވެ. ޓްރެވިސް ނައިޓް ޑައިރެކްޓްކުރި މި ފިލްމުގައި ’ހީ-މޭން‘ ގެ ރޯލުން ނިކޮލަސް ގެލިޓްޒިން ފެންނައިރު، ވިލަން ’ސްކެލެޓަރ‘ ގެ ރޯލުން ފެންނަނީ ޖެރެޑް ލެޓޯ އެވެ. މީގެ އިތުރުން އިޑްރިސް އެލްބާ އާއި ކެމީލާ މެންޑޭޒް ވެސް މި ފިލްމުން ފެނިގެންދެއެވެ.
ތިންވަނަ އަދި ހަތަރުވަނަ އަށް އައީ އޭ24 ގެ ބިރުވެރި ފިލްމު ”ބެކްރޫމްސް“ އާއި ”އޮބްސެޝަން“ އެވެ. 10 މިލިއަން ޑޮލަރުގެ ކުޑަ ބަޖެޓަކުން އުފެއްދި ”ބެކްރޫމްސް“ އަށް މިހާތަނަށް ޖުމްލަ 212 މިލިއަން ޑޮލަރު ލިބިފައިވާއިރު، މިއީ އެ ސްޓޫޑިއޯގެ އެންމެ ކާމިޔާބު ފިލްމެވެ. ފޯކަސް ފީޗާސްގެ ”އޮބްސެޝަން“ އަށް މިހާތަނަށް 152 މިލިއަން ޑޮލަރު ލިބިފައިވާއިރު، މި ހަފުތާ ނިމޭއިރު 200 މިލިއަންގެ އާމްދަނީއެއް މި ފިލްމު ހޯދާނެ ކަމަށް ބެލެވެއެވެ.
ލިސްޓުގެ ފަސްވަނައިގައި ފެތޮމް އެންޓަޓެއިންމަންޓުގެ ”ދަ އެމޭޒިން ޑިޖިޓަލް ސާކަސް: ދަ ލާސްޓް އެކްޓް“ (19.5 މިލިއަން ޑޮލަރު) އޮތްއިރު، ހަވަނައިގައި އޮތީ 10 މިލިއަން ޑޮލަރާއެކު ”ދަ މެންޑަލޯރިއަން އެންޑް ގްރޯގޫ“ އެވެ. ހަތްވަނައިގައި އޮތީ މައިކަލް ޖެކްސަންގެ ހަޔާތުގެ މައްޗަށް ބިނާކޮށް އުފައްދާފައިވާ ބައޮޕިކް ”މައިކަލް“ އެވެ.
އެމެޒޯން އެމްޖީއެމްގެ ޑިސްޓްރިބިއުޝަން ހެޑް ކެވިން ވިލްސަން ވިދާޅުވީ، ސިނަމާތަކަށް މީހުން ޝައުގުވެރިކުރުވުމުގައި މި ފިލްމުތަކުން ބޮޑު ދައުރެއް އަދާކުރަމުންދާ ކަމަށާއި، ކުރިއަށް އޮތް ތަނުގައި އާމްދަނީ އިތުރަށް ރަނގަޅުވާނެ ކަމަށް އުންމީދުކުރާ ކަމަށެވެ.