މަޝްހޫރު ޑައިރެކްޓަރު އަނޫރާގް ކަޝްޔަޕް ޑައިރެކްޓްކޮށް، ބޮބީ ޑިއޯލް ލީޑް ރޯލުން ފެނިގެންދާ ކްރައިމް ތްރިލާ ”ބަންޑާ“ މި ޖޫން މަހުގެ 4 ވަނަ ދުވަހު ސިނަމާތަކަށް ރިލީޒްކޮށްފިއެވެ. މި ފިލްމަކީ ރިލީޒްވި ފުރަތަމަ ދުވަހުވެސް ބޮކްސް އޮފީހުގައި ފާހަގަކޮށްލެވޭ ފަދަ ކުރިއެރުމެއް ހޯދާފައިވާ ފިލްމެކެވެ.
ސަކްނިލްކް އިން ހާމަކޮށްފައިވާ ތަފާސްހިސާބުތަކަށް ބަލާއިރު، ”ބަންޑާ“ ހުޅުވި ދުވަހު އިންޑިއާގައި އެކަނިވެސް 50 ލައްކަ ރުފިޔާގެ ނެޓް އާމްދަނީއެއް ވަނީ ލިބިފައެވެ. މި ފިލްމު އިންޑިއާގެ އެކި ކަންކޮޅުތަކުގައި ރިލީޒްކޮށްފައިވަނީ 300 އަށްވުރެ ކުޑަކޮށް ގިނަ ސްކްރީންތަކުގައެވެ. ފުޅާދާއިރާއެއްގައި ރިލީޒް ނުކުރެވުނު ނަމަވެސް، ފިލްމަށް ވަނީ %13 ގެ އޮކިއުޕެންސީއެއް ލިބިފައެވެ. ބޮބީ ޑިއޯލްގެ މަގުބޫލުކަން މިދުވަސްވަރު އިތުރުވެފައިވުމާއެކު، މި ފިލްމަށް އޮތް އުންމީދުތައް ވަނީ ވަރަށް ބޮޑަށް އުފުލިފައެވެ. ނަމަވެސް، ހަމަ އެދުވަހު ރިލީޒްކުރި ވަރުން ދަވަން އާއި މުރޫނަލް ތަކުރުގެ ”ހައި ޖަވާނީ ތޯ އިޝްގް ހޯނާ ހޭ“ އާ ދެމެދު ވަރުގަދަ ވާދަވެރިކަމެއް ބޮކްސް އޮފީހުގައި އުފެދިފައިވެއެވެ.
ކްރިޓިކްސް އާއި ބެލުންތެރިންގެ ފަރާތުން މި ފިލްމަށް ލިބެމުންދަނީ ވަރަށް ހެޔޮ ރިވިއުތަކެކެވެ. ގިނަ ބަޔަކު ގަބޫލުކުރާ ގޮތުގައި މިއީ ބޮބީ ޑިއޯލްގެ ކެރިއަރުގައި މިހާތަނަށް ފެނިގެންދިޔަ އެންމެ މޮޅު އެކްޓިންއެވެ. އަދި މިއީ އަނޫރާގް ކަޝްޔަޕް ފަހަކަށް އައިސް އުފެއްދި އެންމެ ފުރިހަމަ ފިލްމު ކަމަށްވެސް ގިނަ ބަޔަކު ދަނީ ބުނަމުންނެވެ.
ފިލްމުގެ ހާއްސަ ސްކްރީނިންއެއްގައި ބޮބީގެ ކޮއްކޮ އީޝާ ޑިއޯލް ބައިވެރިވެ، ބޮބީގެ މަސައްކަތަށް ވަނީ ވަރަށް ބޮޑަށް ތައުރީފުކޮށްފައެވެ. އީޝާ ސޯޝަލް މީޑިއާގައި ލިޔެފައިވާ ނޯޓެއްގައި ބުނެފައިވަނީ ބޮބީ މިހާރު ހުރީ އޭނާގެ ކެރިއަރުގެ އެންމެ މޮޅު ފޯމުގައި ކަމަށާއި، އޭނާއަކީ މިއަދު ހުރި އެންމެ މޮޅު އެކްޓަރު ކަމަށެވެ.
”ބަންޑާ“ އަކީ ހަގީގީ ހާދިސާއެއްގެ މައްޗަށް ބިނާކޮށް ސުދީޕް ޝަރްމާ އާއި އަބިޝެކް ބެނާޖީ ލިޔެފައިވާ ފިލްމެކެވެ. މި ފިލްމުގެ ވާހަކަ ބިނާވެފައިވަނީ ކެރިއަރު ދަށަށް ގޮސްފައިވާ ލަވަކިޔުންތެރިއެއް ކަމަށްވާ ސަމާރު (ބޮބީ ޑިއޯލް) ގެ މައްޗަށެވެ. އޭނާގެ މައްޗަށް ރޭޕްގެ ތުހުމަތުކޮށް ހައްޔަރުކުރުމާ ގުޅިގެން ދިމާވާ ގާނޫނީ ގޮންޖެހުންތަކާއި، އޭނާގެ ދިރިއުޅުމަށް އަންނަ ބޮޑު ބަދަލު މި ފިލްމުން ފެނިގެންދެއެވެ.
މި ފިލްމުގައި ބޮބީގެ އިތުރުން ސަންޔާ މަލްހޯތުރާ، ސަޕްނާ ޕަބީ، ސަބާ އަޒާދު، އަދި އިތުރު މުހިއްމު އެކްޓަރުންތަކެއް ހިމެނެއެވެ. ފިލްމަށް ލިބެމުންދާ ރަނގަޅު ރިވިއުތަކާއެކު، ކުރިއަށް އޮތް ދުވަސްތަކުގައި ބޮކްސް އޮފީހުގެ އާމްދަނީ އިތުރުވާނެ ކަމަށް ބެލެވެއެވެ.