ބޮލީވުޑްގެ މަޝްހޫރު އެކްޓަރު އިމްރާން ހާޝްމީގެ ފިލްމީ ހަޔާތުގައި މިހާތަނަށް ނެރުނު އެންމެ ކާމިޔާބު ފިލްމަށް ”އަވާރަޕަން 2“ ވެގެން ގޮސްފައިވާއިރު، މި ފްރެންޗައިޒްގެ ތިންވަނަ ފިލްމެއް އުފެއްދުމުގެ ވިސްނުން ގެންގުޅޭކަމުގެ އިޝާރާތެއް އެ ފިލްމުގެ ލިޔުންތެރިޔާ ބިލާލް ސިއްދީގީ ދީފިއެވެ.
”އަވާރަޕަން 2“ އަކީ އިމްރާން ހާޝްމީ ލީޑް ރޯލު ކުޅެ، ބޮކްސް އޮފީހުގައި 100 ކްރޯޑް ރުޕީސް ހަމަކުރި އޭނާގެ ފުރަތަމަ ފިލްމެވެ. ކުރީގެ ފުރަތަމަ ފިލްމު ބޮކްސް އޮފީހުގައި އެދެވޭ ކާމިޔާބީއެއް ނުލިބި ފްލޮޕްވި ނަމަވެސް، ދެވަނަ ބައިގެ ކަލެކްޝަން މިހާރު ވަނީ 150 ކްރޯޑް ރުޕީސް އަށް ވުރެ މައްޗަށް އަރައިފައެވެ. މި ބޮޑު ކާމިޔާބީއާ އެކު، އަދި ފިލްމު ނިމިގެންދިޔަ ގޮތުން، ”އަވާރަޕަން 3“ އެއް ފެނިދާނެ ކަމާމެދު ބެލުންތެރިންގެ މެދުގައި ވަނީ ބޮޑެތި ސުވާލުތަކާއި ޝައުގުވެރިކަން އުފެދިފައެވެ.
”އަވާރަޕަން 2“ ނިމިގެންދަނީ ޝިވަމް (އިމްރާން ހާޝްމީ)، ޒޯރާވާރް (ޕޫރާން ގަބީ) ގެ ބާރުގެ ދަށުން ޓްރެފިކްކޮށްފައިވާ ކުދިންތަކެއް ސަލާމަތްކުރާ ހިސާބުންނެވެ. އަދި ވާހަކައިގެ ތެރެއިން އެނގިގެންދަނީ ޒޯރާވާރުގެ ވާދަވެރިޔާ ނަފީސާ (ޝަބާނާ އަޒްމީ) ޝިވަމްގެ މި މިޝަނަށް އެއްބާރުލުން ދިން ކަމެވެ. މި ފިލްމު ނިމެނީ ނަފީސާގެ ގޭންގާ ޝިވަމް ގުޅޭ މަންޒަރާއެކުގައެވެ.
މި ފިލްމުގައި ޝަބާނާ އަޒްމީ އަދާކުރި ރޯލާ ގުޅޭގޮތުން ވާހަކަދައްކަމުން ލިޔުންތެރިޔާ ބިލާލް ސިއްދީގީ ”ހިންދުސްތާން ޓައިމްސް“ އަށް ދިން އިންޓަވިއުއެއްގައި ބުނީ، މުޅި ފިލްމުގައި އޭނާ ސްކްރީނުން މާ ގިނައިން ނުފެނުނު ނަމަވެސް، ވާހަކައިގެ މައިގަނޑު ކެރެކްޓާގެ ދަތުރު ބަދަލުކޮށްލުމުގައި ނަފީސާގެ ދައުރު ވަރަށް ބޮޑު ކަމަށެވެ.
”އަހަރެން ދެކޭ ގޮތުގައި އެއީ ވަރަށް މުހިންމު ރޯލެއް. އަދި އޭނާ އުއްމީދު ކުރަނީ ވަރަށް ބޮޑު ކަމެއް ކުރަން ތައްޔާރުވެގެންދާނެ ކަމަށް،“ ކުރިއަށް އޮތް ފިލްމަކަށް އިޝާރާތް ކުރަމުން ބިލާލް ބުންޏެވެ.
ލިޔުންތެރިޔާގެ މި ވާހަކަތަކުން ދޭހަވަނީ ޝިވަމް ޕަންޑިތުގެ ކެރެކްޓާއާއެކު އިތުރު ފިލްމެއްގެ މަސައްކަތް ކުރުމުގެ ޕްލޭންތަކެއް އެބައޮތް ކަމެވެ. މިއާއެކު ސިނަމާތަކުގައި ބޮޑު ތަރުހީބެއް ހޯދަމުން އަންނަ މި ފްރެންޗައިޒްގެ ތިންވަނަ ބަޔަކަށް ބެލުންތެރިން ކުރާ އިންތިޒާރު މިހާރު ވަނީ އިތުރަށް ބޮޑުވެފައެވެ