މާވަލް ސިނަމެޓިކް ޔުނިވާސްގެ ސަޕޯޓަރުން އެންމެ އިންތިޒާރުކުރަމުންދާ އެއް ފިލްމު ކަމަށްވާ ’ސްޕައިޑަރ މޭން: ބްރޭންޑް ނިއު ޑޭ‘ ގެ ރަސްމީ ޕޯސްޓަރު މިއަދު އާންމުކޮށްފިއެވެ. ސިނަމާކޮން 2026 ގައި ދައްކާލި ޓީޒާ ޕޯސްޓަރުތަކަށްފަހު، މިއަދު ނެރުނު މި ރަސްމީ ޕޯސްޓަރުގައި ފެނިގެންދަނީ ވެބް-ސްލިންގިންގ ހީރޯގެ ގޮތުގައި ޕީޓާ ޕާކަރ އެވެ.
މި ފިލްމަކީ ގިނަ ބައެއްގެ މަގުބޫލުކަން ހޯދި ’ސްޕައިޑަރ މޭން: ނޯ ވޭ ހޯމް‘ ގެ ސީކުއެލް އެވެ. ކުރީގެ ފިލްމު ނިމުނުތާ ހަތަރު އަހަރު ފަހުގެ މަންޒަރުތައް މި ފިލްމުން ފެނިގެންދާއިރު، ދުނިޔެއިން ޕީޓާ ޕާކާގެ މަތިން ހަނދާން ނެތިފައިވީ ނަމަވެސް، އޭނާ އަދިވެސް އެމީހުންގެ މަތިން ހަނދާން ނައްތައެއް ނުލައެވެ. މިހާރު އޭނާ އުޅެނީ މުޅިން އެކަނިމާއެކަނި، ސްޕައިޑަރ މޭންގެ ރޯލުން ފުލްޓައިމްކޮށް ކުށްތަކާ ދެކޮޅަށް ހަނގުރާމަ ކުރުމުގައެވެ.
ޕޯސްޓަރާއެކު، ފިލްމުގެ މަންޒަރުތައް ނެގުމުގެ ތެރެއިން ”ބިހައިންޑް ދަ ސީންސް“ ވީޑިއޯއެއް ވެސް ވަނީ އާންމުކޮށްފައެވެ. މި ވީޑިއޯއިން ފިލްމުގެ އޮޕަނިން އެކްޝަން ސީކުއެންސްތައް ފިލްމުކުރި ގޮތާއި، ލީޑް އެކްޓަރު ޓޮމް ހޮލެންޑް އަދި ޑައިރެކްޓަރު ޑެސްޓިން ޑޭނިއަލް ކްރެޓަން މަސައްކަތްކުރާ މަންޒަރުތައް ފެނިގެންދެއެވެ.
ޑެސްޓިން ޑޭނިއަލް ކްރެޓަން ޑައިރެކްޓްކޮށްފައިވާ މި ފިލްމުގައި ވެސް ސްޕައިޑަރ މޭންގެ ރޯލުން ފެނިގެންދާނީ ޓޮމް ހޮލެންޑެވެ. ”ސްޕައިޑަރ މޭން: ބްރޭންޑް ނިއު ޑޭ“ ސިނަމާތަކަށް ރިލީޒްކުރުމަށް ހަމަޖެހިފައިވަނީ ޖުލައި 31، 2026 ގައެވެ. މި ހޫނު މޫސުމުގައި ސްޕައިޑީ އަނބުރާ ބޮޑު ސްކްރީނަށް އައުމަށް ކުރާ އިންތިޒާރު މިހާރު މިވަނީ އިތުރަށް ބޮޑުވެފައެވެ.