ސްކޫލަކަށް ވަދެ ޓީޗަރުންނަށް ބިރުދެއްކިކަމުގެ ތުހުމަތުގައި ހައްޔަރުކުރެވުނު މީހެއްގެ ބަންދު މުއްދަތު އިތުރުކޮށްފިއެވެ. މި މައްސަލައިގައި ހައްޔަރުކުރެވިފައިވަނީ މއ. ކަނޑޫގެ، އަލީ އަހްމަދެވެ.
އަލީ އަހްމަދު ހައްޔަރުކުރެވުނީ މީގެ މަހެއްހާ ދުވަސް ކުރިންނެވެ. ފުރަތަމަ ފަހަރު ކޯޓަށް ހާޒިރުކުރުމުން 30 ދުވަހަށް ބަންދުކުރުމަށް އަމުރުކުރެވުނެވެ. އެ މުއްދަތު ހަމަވުމުން، ދެވަނަ ފަހަރަށް ކޯޓަށް ގެންދިއުމުން އިތުރު 10 ދުވަހަށް ބަންދުކުރުމަށް އަމުރުކޮށްފައިވެއެވެ.
ބަންދު އަމުރު ރިޕޯޓުން އ އެނގޭ ގޮތުގައި، އަލީ އަހްމަދު ސްކޫލަކަށް ވަދެ، އަޑުގަދަކޮށް ޓީޗަރުންނަށް ބިރުދެއްކި ކަމަށް އެ ސްކޫލުގެ މުވައްޒަފުން ބުނެފައިވެއެވެ. ނަމަވެސް، އެއީ ކޮން ސްކޫލެއްކަން އަދި ހާމަކުރެވިފައެއް ނުވެއެވެ.
އަލީ އަހްމަދަކީ ކުރިންވެސް ކުށުގެ ރެކޯޑް އޮތް މީހެކެވެ. 2020 ވަނަ އަހަރު ރާއްޖެއަށް 72 ކިލޯގެ މަސްތުވާތަކެތި އެތެރެކުރި މައްސަލައިގައި އޭނާގެ މައްޗަށް ޑައިމޯފިން ޓްރެފިކްކުރުމުގެ ދަޢުވާ އުފުލިފައިވެއެވެ.
މި މައްސަލައާ ގުޅޭގޮތުން ފުލުހުންނާއި އެޑިޔުކޭޝަން މިނިސްޓްރީން އަދި ރަސްމީ ބަޔާނެއް ދީފައެއް ނުވެއެވެ. މައްސަލައިގެ ތަޙްޤީޤު ކުރިއަށްދާ ކަމަށް ބެލެވެއެވެ.