ކުރިއަށް އޮތް ތިން އަހަރުގެ ތެރޭގައި ރާއްޖޭގެ ހުރިހާ ރަށެއްގައި ސްމާޓް މީޓަރު ބޭނުންކުރަން ފަށާނެ ކަމަށް އެންވަޔަރުމަންޓް މިނިސްޓަރު ތޯރިގް އިބްރާހިމް މިރޭ ވިދާޅުވެއްޖެ އެވެ.
މިނިސްޓަރު މިހެން ވިދާޅުވީ ދ. ކުޑަހުވަދޫގެ ހުރިހާ ގެތަކެއްގައި ބޭނުންކުރާ ކަރަންޓު މީޓަރުތައް ސްމާޓް މީޓަރަށް ބަދަލުކުރުމަށް ކުރިއަށް ގެންދިޔަ މަޝްރޫއުގެ ނިމުން ފާހަގަކުރުމަށް ބޭއްވި ރަސްމިއްޔާތުގައެވެ.
މިނިސްޓަރު ތޯރިގު ވިދާޅުވީ ކުޑަހުވަދޫގައި ސްމާޓް މީޓަރު ހަރުކުރުމުގެ މަޝްރޫއަކީ ރާއްޖޭގެ ހަކަތައިގެ ސިނާއަތަށް ގެނައި އިންގިލާބީ ކުރިއެރުމެއް ކަމަށެވެ. އަދި ކުރިއަށް އޮތް ދެތިން އަހަރުގެ ތެރޭގައި ރާއްޖޭގެ ހުރިހާ ރަށެއްގައި ސްމާޓް މީޓަރު ހަރުކޮށް ނިމި ބޭނުންކުރަން ފެށޭނެ ކަމަށް އޭނާ ވިދާޅުވިއެވެ.
މިނިސްޓަރު ވިދާޅުވީ ސްމާޓް މީޓަރުތަކުން ކަރަންޓު އެންމެ ގިނައިން ބޭނުންކުރެވޭ ގަޑިތަކާއި އެއް ދުވަސްތެރޭ ކަރަންޓު ބޭނުން ކުރެވެނީ ކިހާ އަދަދެއް ކަން ބަލައިލެވޭނެ ކަމަށެވެ. އަދި ކުރިއަށް އޮތް ތަނުގައި ގަޑިއިރަކު ބޭނުން ކުރަނީ ކިހާ ކަރަންޓެއްކަން ވެސް އެނގިގެންދާނެ ކަމަށް އޭނާ ވިދާޅުވިއެވެ.
މީގެ އިތުރުން މިނިސްޓަރު ވިދާޅުވީ މިއީ ހަކަތަ އިގްތިސާދު ކުރުމަށް އެޅިގެން ދިޔަ ފިޔަވަޅެއް ކަމަށާއި ކަރަންޓު ލީކެއް އުޅޭ ނަމަ މީގެ ސަބަބުން އެނގޭނެ ކަމަށެވެ.
މިނިސްޓަރު ތޯރިގު ވިދާޅުވީ ސްމާޓް މީޓަރު ހަރުކުރުމަކީ މި ސަރުކާރުން ވަރަށް ބޮޑު އިސްކަމެއް ދޭ މަޝްރޫއުއެއް ކަމަށާއި ފެނަކަ އާއި ސްޓެލްކޯ އިން ކަރަންޓުގެ ހިދުމަތްދޭ ރަށްރަށުގައި މިމަޝްރޫއު ނިންމުމަކީ އަމާޒެއް ކަމަށެވެ.
މިނިސްޓަރު ތޯރިގު އިތުރަށް ވިދާޅުވީ މިދިޔަ ފަސް އަހަރު ހަކަތައިގެ ދާއިރާ ކުރިއެރުވުމަށް އެއްވެސް މަސައްކަތެއް ކޮށްފައި ނުވާ ކަމަށާއި އަހަރުން އަހަރަށް ކަރަންޓަށް އޮތް ޑިމާންޑު 10 ޕަސެންޓަށް އިތުރު ވެފައިވާ ކަމަށެވެ.
މި ޚަބަރުން އެނގެނީ ސަރުކާރުން ހަކަތައިގެ ދާއިރާ ތަރައްޤީ ކުރުމަށް އަޅަމުންދާ މުހިންމު ފިޔަވަޅުތަކެއްގެ މައުލޫމާތެވެ. ޚާއްޞަކޮށް ސްމާޓް މީޓަރު ތައާރަފުކުރުމަކީ ކަރަންޓުގެ ބޭނުން ހެޔޮގޮތުގައި ކުރުމަށާއި، ހަކަތަ އިޤްތިޞާދު ކުރުމަށް އެޅޭ މުހިންމު ފިޔަވަޅެއް ކަމަށް ފާހަގަކުރެވެއެވެ. އަދި ކުރިއަށް އޮތް ތިން އަހަރުގެ ތެރޭގައި މުޅި ރާއްޖޭގައި މި ނިޒާމު ތައާރަފުކުރުމަކީ ސަރުކާރުގެ މުހިންމު އަމާޒެއް ކަމަށްވެސް މި ޚަބަރުން އެނގެއެވެ.
ނޫސްވެރިޔާ