ރާއްޖޭގެ ފަތުރުވެރިކަމުގެ މާކެޓްގެ ގަދަ 10 ގައުމުން މިއަހަރުގެ މިހާތަނަށް 848,000 އަށްވުރެ ގިނަ ފަތުރުވެރިން ޒިޔާރަތްކޮށްފިއެވެ. ޓޫރިޒަމް މިނިސްޓްރީގެ ތަފާސްހިސާބުތަކަށް ބަލާއިރު މިމަހުގެ 20 ވަނަ ދުވަހުގެ ނިޔަލަށް ރާއްޖެ ޒިޔާރަތްކުރި ޖުމްލަ 1.3 މިލިއަން ފަތުރުވެރިންގެ ތެރެއިން 848,210 ފަތުރުވެރިންނަކީ މާކެޓްގެ ގަދަ 10 ގައުމުގެ ފަތުރުވެރިންނެވެ. މިއީ މިއަހަރުގެ މިހާތަނަށް ޒިޔާރަތްކުރި ޖުމްލަ ފަތުރުވެރިންގެ 64.8 ޕަސެންޓެވެ.
ފަތުރުވެރިކަމުގެ ގަދަ 10 ގައުމުގެ ތެރޭގައި ޗައިނާ، ރަޝިއާ، އިނގިރޭސިވިލާތް، އިޓަލީ، ޖަރުމަނު، އިންޑިއާ، އެމެރިކާ، ފްރާންސް، ސްޕެއިން އަދި ސްވިޓްޒަލޭންޑް ހިމެނެއެވެ. މީގެ ތެރެއިން އެންމެ ގިނަ ފަތުރުވެރިން ޒިޔާރަތްކޮށްފައިވަނީ ޗައިނާއިން ކަމަށްވާއިރު، އެ އަދަދަކީ 188,229 އެވެ.
ޓޫރިޒަމް މިނިސްޓްރީގެ ތަފާސްހިސާބުތަކަށް ބަލާއިރު ރާއްޖެއަށް މިއަހަރުގެ މިހާތަނަށް ޒިޔާރަތްކުރި ފަތުރުވެރިންގެ އަދަދު މިދިޔަ އަހަރުގެ މި މުއްދަތަށްވުރެ 10.4 ޕަސަންޓް އިތުރުވެފައިވެއެވެ. މިދިޔަ އަހަރުގެ މި މުއްދަތުގައި ރާއްޖެ އައީ 1.1 މިލިއަން ފަތުރުވެރިންނެވެ.
މިހާރު ރާއްޖޭގައި ފަތުރުވެރިންނަށް ޚިދުމަތް ދިނުމަށް 1,220 ފެސިލިޓީއެއް ހިންގަމުންދާއިރު އޭގެ ތެރޭގައި 174 ރިސޯޓާއި 879 ގެސްޓްހައުސްގެ އިތުރުން 153 ސަފާރީ އަދި 14 ހޮޓާ ހިމެނެއެވެ.
މި ތަފާސްހިސާބުތަކުން ދައްކާ ގޮތުގައި، ރާއްޖޭގެ ފަތުރުވެރިކަމުގެ ސިނާޢަތު ދަނީ ކުރިއަރަމުންނެވެ. ޚާއްޞަކޮށް އޭޝިއާ އަދި ޔޫރަޕުގެ ގައުމުތަކުން އަންނަ ފަތުރުވެރިންގެ އަދަދު އިތުރުވަމުން ދާކަން ފާހަގަކުރެވެއެވެ.
ނޫސްވެރިޔާ