15 އޮކްޓޯބަރު 2023
މުޅި ތަނަށް ވެރިވެފައިވަނީ އާދަޔާ ހިލާފު ހަމަހިމޭން ކަމެކެވެ. އިވެމުންދަނީ އަހަރުމެންނަށް ނުފެންނަ ސޫފީގެ އަޑުން މުޅި ޖައްވު ގުގުމާލާފައިވާ އަޑެވެ. އެ އަޑާ އެއްވަރަށް ކޮޓަރީގައި ހަރުކޮށްފައިވާ ގަޑީގެ ކަށި ހިނގަމުންދާ ”ޓިކް ޓިކް“ އަޑު ކަންފަތުގައި ޖެހެމުންދެއެވެ. މި އަޑުތަކުން ހީވަނީ ވަގުތުގެ ހިނގުން މަޑުޖެހިފައިވާ ހެންނެވެ.
އަހަރެން ކޮންމެ ރެޔަކުވެސް ކުރާ މަސައްކަތަކީ ނިދޭތޯ މަސައްކަތް ކުރުމެވެ. ނަމަވެސް މިރޭވެސް އަހަރެންނަށް ނިދީގެ ކަންފުޅެއްވެސް ނެތް ކަހަލައެވެ. ލޯ މަރާލައިގެން އެތައް އިރަކު އޮތް ނަމަވެސް، ނިދި ވަނީ އަހަރެންނަށް ބީރައްޓެހި އެއްޗަކަށް ވެފައެވެ. ސިކުނޑީގައި އެނބުރެމުންދާ ހިޔާލުތަކުން އަހަރެންގެ އަރާމު ވަނީ ނަގާލާފައެވެ.
ބައެއް ފަހަރު މިހެން ނިދި ނުލިބިގެން ތެޅިފޮޅޭން އޮންނަން އުނދަގޫވުމުން، ތެދުވެގެން ސިޓިންގ ރޫމަށް ދަމެވެ. އެތަނުގައި ހުންނަ ފޮތް ހަރުގަނޑުން ފޮތެއް ނަގައިގެން ކިޔަން ފަށަމެވެ. އޭރުން ފަހަރުގައި ހިތަށް ހަމަޖެހުމެއް ލިބި ނިދި އަތުވެދާނެ ކަމުގެ އުއްމީދުގައެވެ. ނަމަވެސް ގިނަ ރޭރޭ އެހެން އޮއްވައި ފަތިސް ނަމާދުގެ ބަންގީގެ އަޑު އިވެންދެން ހޭލާ ހުރެވެއެވެ.
މިއަދުގެ ހެނދުނަކީ ވަރަށް ތަފާތު ހެނދުނެކެވެ. އުޑުމަތި ސާފު، ރީތި ދުވަހެކެވެ. ވައިރޯޅިއެއްގެ ކަންފުޅެއްވެސް ނެތް ފަދައެވެ. އަހަރެން މިވަގުތު ހުރީ ބަނދަރުމަތީގައެވެ. ކަނޑުގެ ލޮނުގަނޑު މަޑު މައިތިރިކޮށް އޮތްއިރު، ދުރުދުރަށް ދާންދެން ފެންނަނީ ހަމަހިމޭންކަމެވެ. ރޭގެ އެ ނިދިނެތް ވަގުތުތަކަށްފަހު، މި ހަމަހިމޭން މާހައުލުން ހިތަށް ކޮންމެވެސް ވަރެއްގެ ތަސައްލީއެއް ލިބޭތޯ އަހަރެން މަސައްކަތް ކުރަމުންދަމެވެ.