ފިނޭންސް މިނިސްޓްރީގެ ތަފާސް ހިސާބުތަކުން ދައްކާގޮތުގައި މިއަހަރުގެ ބަޖެޓުގައި ދަތުރުފަތުރަށް ކަނޑައެޅި އަދަދަށްވުރެ 3 މިލިއަން ރުފިޔާ އިތުރަށް މިހާތަނަށް ޚަރަދުވެއްޖެއެވެ. މިގޮތުން ދަތުރުފަތުރުގެ ޖުމްލަ ޚަރަދު 231 މިލިއަން ރުފިޔާއަށް އަރާފައިވެއެވެ.
ބަޖެޓުގައި ދަތުރުފަތުރަށް ކަނޑައަޅާފައިވަނީ 228 މިލިއަން ރުފިޔާއެވެ. މީގެ ތެރެއިން ބޭރު ދަތުރުތަކަށް 69 މިލިއަން ރުފިޔާ، އެތެރޭގެ ވައިގެ ދަތުރުތަކަށް 54 މިލިއަން ރުފިޔާ، އަދި ކަނޑު ދަތުރުތަކަށް 45 މިލިއަން ރުފިޔާ ހިމެނެއެވެ.
މިއަހަރުގެ ދަތުރުފަތުރުގެ ޚަރަދު މިދިޔަ އަހަރާ އަޅާބަލާއިރު 7 ޕަސެންޓު އިތުރުވެފައިވެއެވެ. މިދިޔަ އަހަރުގެ މި މުއްދަތުގައި ދަތުރުފަތުރަށް ހޭދަކޮށްފައިވަނީ 216 މިލިއަން ރުފިޔާއެވެ.
މިއަހަރުގެ މިހާތަނަށް ދައުލަތުގެ ބަޖެޓުން ޖުމްލަ 40 ބިލިއަން ރުފިޔާ ޚަރަދުކޮށްފައިވާއިރު، އޭގެ ތެރެއިން 70 ޕަސެންޓު (28 ބިލިއަން ރުފިޔާ) ހޭދަކޮށްފައިވަނީ ސަރުކާރުގެ މުވައްޒަފުންގެ މުސާރައާއި ހިންގުމުގެ ޚަރަދަށެވެ.
ސަޕްލިމެންޓްރީ ބަޖެޓާއެކު މިއަހަރުގެ ޖުމްލަ ބަޖެޓު 55 ބިލިއަން ރުފިޔާއަށް އަރާނެކަމަށް ލަފާކުރެވެއެވެ.