އިސްލާމިކް މިނިސްޓްރީން އިމާމުންނާއި މުދިމުންގެ ސުލޫކީ މިންގަނޑު ބަލަހައްޓަންވީ ގޮތުގެ އައު އުސޫލެއް އެކުލަވާލައިފިއެވެ. މި އުސޫލުގެ ދަށުން، އިމާމުން ޖިންސާއި ޓީޝާޓު ފަދަ ތަކެތި ލައިގެން އިމާމުވެ ނަމާދުކުރުން މަނާކޮށްފައިވެއެވެ.
މި އުސޫލުގައި ބަޔާންކޮށްފައިވާ ގޮތުގައި، އިމާމުންނާއި މުދިމުންނަކީ އިސްލާމްދީނާއި، ރާއްޖޭގެ އްޖޭގެ ޤާނޫނުއަސާސީއާއި، ޤާނޫނުތަކާއި ގަވާއިދުތަކާއި އާންމު އިޖުތިމާޢީ މިންގަނޑުތަކާ އެއްގޮތަށް ޢަމަލުކުރާ ބައެއްކަން ކަށަވަރުކުރުމަށް މަސައްކަތްކުރަންވާނެއެވެ. އަދި ރަސްމީ ގަޑީގައި ހެދުން އަޅަންވާނީ އިސްލާމީ މުޖުތަމަޢު ބަލައިގަންނަ އަދި އިމާމުވެ ނަމާދުކުރުމަށް އެކަށީގެންވާ ގޮތަށެވެ.
އުސޫލުގައި ވަކިން ޚާއްޞަކޮށް ބަޔާންކޮށްފައިވާ ގޮތުގައި، ޖިންސާއި ޓީޝާޓު ލައިގެން އަދި ގަޔަށް ބާރު ހެދުން ލައިގެން އިމާމުވެ ނަމާދުކުރުން މަނާކުރެވިފައިވެއެވެ. މީގެ އިތުރުން، ބަންގި ގޮވުމާއި އިމާމުވެ ނަމާދުކުރާއިރު ބޮލުގައި އެއްޗެއް އެޅުމަށް ފަރުވާތެރިވުމަށްވެސް އަންގާފައިވެއެވެ.
އުސޫލުގައި އިމާމުންނާއި މުދިމުންގެ އަޚްލާޤީ މިންގަނޑުތަކަށްވެސް ބާރުއަޅާފައިވެއެވެ. މިގޮތުން، ސާފުތާހިރުކަމާއި، މިސްކިތަށް އަންނަ ފަރާތްތަކާއި މުޖުތަމަޢުގެ އާންމު ފަރުދުންނާ މުޢާމަލާތްކުރުމުގައި ރީތި ބަހުން ވާހަކަދެއްކުމަށް އަންގާފައިވެއެވެ. އަދި އެހެން މީހުންނަށް ނަމޫނާ ބަޔަކަށްވުމާއި، އިމާމުންގެ ގަދަރާއި ހައިބަތާއި އިތުބާރު ގެއްލޭފަދަ ޢަމަލުތަކުން ދުރުހެލިވުމަށްވެސް އަންގާފައިވެއެވެ.
މުދިމުންނަށް ޚާއްޞަކޮށް، ދީނީ އެއްބައިވަންތަކަން ހިމާޔަތްކުރުމުގެ ޤާނޫނާއި އެ ޤާނޫނުގެ ދަށުން އެކުލަވާލާފައިވާ ގަވާއިދުތަކާ ޚިލާފު އެއްވެސް ޢަމަލެއް ނުހިންގުމަށާއި، ދީނީގޮތުން ޚިލާފު އުފެދޭ ކަންކަމުގައި މިނިސްޓްރީން ކަނޑައަޅާފައިވާ މިންގަނޑު ހިފެހެއްޓުމަށް އަންގާފައިވެއެވެ.
މި އުސޫލާ ޚިލާފުވާ ފަރާތްތަކާމެދު، އެކަމެއްގެ ކުޑަބޮޑުމިނަށް ބަލައި، ސިވިލް ސަރވިސް ގަވާއިދުގެ ދަށުން ފިޔަވަޅު އެޅުމުގެ ބާރު އިސްލާމިކް މިނިސްޓްރީއަށް ލިބިގެންވާކަން އުސޫލުގައން އުސޫލުގައި ބަޔާންކޮށްފައިވެއެވެ.
މި އައު އުސޫލަކީ އިމާމުންނާއި މުދިމުންގެ ފެންވަރު މަތިކޮށް، މިސްކިތްތަކުގެ ޚިދުމަތުގެ ފެންވަރު ރަނގަޅުކުރުމަށް އަމާޒުކޮށްގެން އެކުލަވާލާފައިވާ އުސޫލެއްކަން ފާހަގަކުރެވެއެވެ.