އުރުގުއޭ ގައުމީ ފުޓުބޯޅަ ޓީމުގެ ތަރި ލުއިސް ސުއަރޭޒް ގައުމީ ޓީމުން ރިޓަޔަރކުރަން ނިންމައިފި ކަމަށް ކުޅިވަރު ރިޕޯޓުތަކުގައި ބުނެފައިވެއެވެ. ސުއަރޭޒްއަކީ އުރުގުއޭގެ ގައުމީ ފުޓުބޯޅަ ޓީމަށް އެންމެ ގިނަ ގޯލު ޖަހައިދިނުމުގެ ރެކޯޑް އޮތް ކުޅުންތެރިޔާއެވެ. އަދި ގިނަ ބަޔަކު ގަބޫލުކުރާ ގޮތުގައި އޭނާއަކީ އުރުގުއޭގެ ތާރީޚުގައިވެސް އުފެދުނު އެންމެ ހުނަރުވެރި އަދި އެންމެ ކާމިޔާބު އެއް ކުޅުންތެރިޔާއެވެ.
އުމުރުން 37 އަހަރުގެ ސުއަރޭޒްއާ ބެހޭ ގޮތުން ބައެއް ނޫސްތަކުގައި ރިޕޯޓުކޮށްފައިވާ ގޮތުން، އަންނަ ހުކުރު ދުވަހު ޕެރަގުއޭއާ ދެކޮޅަށް ކުޅޭ ފީފާ ވޯލްޑް ކަޕް ކޮލިފައިން މެޗަކީ ގައުމީ ޖާޒީގައި އޭނާ ފެންނާނެ ފަހު މެޗެވެ.
2007 ވަނަ އަހަރު ގައުމީ ޓީމަށް ކުޅެން ފެށި ސުއަރޭޒް، ގައުމީ ޓީމުގައި ހޭދަކުރި 17 އަހަރުގެ ތެރޭގައި އެ ޓީމަށް 142 މެޗު ކުޅެދީ 69 ލަނޑު ޖަހައިދީފައިވެއެވެ.
ސުއަރޭޒްގެ ކެރިއަރުގެ އެންމެ ކާމިޔާބު ދުވަސްތައް ހޭދަކޮށްފައިވަނީ ސްޕޭނުގެ ފުޓުބޯޅަ ކްލަބް، ބާސެލޯނާގައެވެ. އޭނާއަކީ ޔޫރަޕުގެ ރަންބޫޓުވެސް ހޯދާފައިވާ ކުޅުންތެރިއެކެވެ. މިހާރު އޭނާ ކުޅެމުން އަންނަނީ އެމެރިކާގެ އިންޓަ މިއާމީއަށެވެ.
ސުއަރޭޒް ވަނީ އުރުގުއޭގެ ޓީމާއެކު 2014، 2018 އަދި 2022 ވަނަ އަހަރުގެ ވޯލްޑް ކަޕްގައި ކުޅެފައެވެ. އަދި 2011 ވަނަ އަހަރުގެ ކޮޕަ އެމެރިކާ އުރުގުއޭއަށް ކާމިޔާބުކޮށްދިނުމުގައިވެސް ވަރަށް މުހިންމު ރޯލެއް އަދާކޮށްފައިވެއެވެ.
ސުއަރޭޒް ގައުމީ ޓީމާ ވަކިވުމާ ގުޅިގެން އޭނާއަށް ސަޕޯޓުކުރާ އެތައް ބަޔަކު ދަނީ އޭނާގެ ކުޅުމަށް ތަޢުރީފުކޮށް ސޯޝަލް މީޑިއާގައި ތަޢުރީފުގެ މެސެޖުތައް ރައްދުކުރަމުންނެވެ.