ޕޯޗުގަލްގެ ފުޓުބޯޅަ އައިކަން އަދި ލެޖެންޑް ކްރިސްޓިއާނޯ ރޮނާލްޑޯ ވަނީ އޭނާގެ ކުޅުންތެރިކަމުގެ މުސްތަޤުބަލާ ގުޅޭ ގޮތުން މުހިންމު ހާމަކުރުންތަކެއް ކޮށްފައެވެ. ނޫހަކަށް ދިން އިންޓަވިއުއެއްގައި 39 އަހަރުގެ ރޮނާލްޑޯ ބުނެފައިވަނީ، ގާތްގަނޑަކަށް ދެތިން އަހަރު ފަހުން ކުޅުން ހުއްޓާލާއިރު ހުންނާނީ މިހާރު ކުޅެމުންދާ އަލް ނަސްރުގައި ކަމަށެވެ.
ރޮނާލްޑޯ ބުނީ އަލް ނަސްރުގައި ހޭދަވި ދުވަސްތައް ވަރަށް އުފާވެރިކަމަށާއި ސައުދީގައި ކެރިއަރު ނިންމާލަން ބޭނުންވާ ކަމަށެވެ. އަލް ނަސްރަށް މިދިޔަ އަހަރުން ފެށިގެން ކުޅެމުން އަންނަ ރޮނާލްޑޯ ވަނީ 44 މެޗު ކުޅެ 44 ގޯލް އެޓީމަށް ކާމިޔާބުކޮށްދީ 14 ލަނޑު ޖެހުމަށް އެހީތެރިވެދީފައެވެ.
ރޮނާލްޑޯގެ ފުޓުބޯޅަ ހަޔާތް ފަށާފައިވަނީ ޕޯޗުގަލްގެ ސްޕޯޓިން ލިޒްބަންގައެވެ. އޭގެ ފަހުން މެންޗެސްޓާ ޔުނައިޓެޑް، ރެއާލް މެޑްރިޑް އަދި ޔުވެންޓަސް ފަދަ މަޝްހޫރު ކުލަބުތަކަށްވެސް ކުޅެފައިވެއެވެ. މިހާތަނަށް އެންމެ ގިނަ ގޯލު ކާމިޔާބު ކުރި ކުޅުންތެރިޔާގެ ރެކޯޑް އޮތް ރޮނާލްޑޯ ވަނީ 898 ގޯލު ކާމިޔާބުކޮށްފައެވެ.
ދުނިޔޭގެ އެންމެ މޮޅު ކުޅުންތެރިޔާއަށް ދޭ ބެލޮން ޑޯ ފަސް ފަހަރު އަދި ފީފާއިން ދޭ ބެސްޓް ފީފާ މެންސް ޕްލޭޔަރ އެވޯޑު ތިން ފަހަރު ރޮނާލްޑޯ ހޯދާފައިވެއެވެ.