ސަތާރަ އަހަރުން ދަށުގެ ސާފް ޗެމްޕިއަންޝިޕުގައި ދިވެހިރާއްޖެ ވާދަކުރާނީ އިންޑިއާ އަދި ބަންގްލަދޭޝްއާ އެކު ގްރޫޕް އޭގައެވެ. ބޫޓާނުގައި މި މަހުގެ 20 އިން 30 އަށް ބާއްވާ މި މުބާރާތުގެ ގްރޫޕް ބީގައި ހިމެނެނީ ބޫޓާން، ނޭޕާލް، ޕާކިސްތާން އަދި ސްރީ ލަންކާއެވެ.
ރާއްޖޭގެ ފުރަތަމަ މެޗު އޮންނާނީ 22 ގައި ބަންގްލަދޭޝްއާ ދެކޮޅަށެވެ. އިންޑިއާއާ ދެކޮޅަށް ކުޅޭ މެޗު އޮންނާނީ 24 ގައެވެ. ސެމީ ފައިނަލަށް ހޮވޭނީ ކޮންމެ ގްރޫޕަކުން އެންމެ ގިނަ ޕޮއިންޓް ހޯދާ ދެ ޓީމެވެ.
މުބާރާތަށް ރާއްޖޭގެ ޓީމުން ވަނީ މުޙައްމަދު އާދަމްގެ ކޯޗުކަމުގައި މީގެ މަހެއްހާ ދުވަސް ކުރިން ޕްރެކްޓިސް ފަށާފައެވެ. މުޙައްމަދަކީ ކުރިން ވިކްޓްރީ އާއި ޔުނައިޓެޑް ވިކްޓްރީ އަށް ފުރަތަމަ ޑިވިޝަނުގައި ކޯޗުކޮށްދީފައިވާ ތަޖުރިބާކާރެކެވެ.
ރާއްޖޭގެ ޓީމުގައި ހިމެނޭ ފާހަގަކޮށްލެވޭ ކުޅުންތެރިންގެ ތެރޭގައި މިދިޔަ ސީޒަނުގައި ވެލެންސިއާ އަށް ކުޅުނު މުޙައްމަދު އިލާން އިމްރާނާއި، އަޔާން އާމިރު ހިމެނެއެވެ. މީގެ އިތުރުން ސްޕެއިނުގައި އެކަޑަމީ ލެވެލްގައި ކުޅެމުން އަންނަ އީތަން އިބްރާހިމް ޒަކީ ވެސް ޓީމާ ގުޅޭނެ ކަމަށް މަޢުލޫމާތު ލިބިފައިވެއެވެ.
ތަޖުރިބާކާރުން މި ޓީމު ފާހަގަކުރަނީ ފަހަކަށް އައިސް ރާއްޖޭން ހޮވާލެވޭނެ އެންމެ ހުނަރުވެރި ޒުވާން ޓީމުގެ ގޮތުގައެވެ. ގިނަ ކުޅުންތެރިންނަކީ އެކަޑަމީތަކުގެ އުފެއްދުންތަކެވެ. އެފްއޭއެމްގެ ހިންގުމުގައި ދަތިތަކެއް ހުރި ނަމަވެސް، އެކަޑަމީތައް އަދިވެސް ހިނގަމުންދާކަން ފާހަގަކުރެވެއެވެ.