ޖަޕާނުގެ ދެކުނުގައި އުފެދުނު ތޫފާން ޝަންޝާންގެ ސަބަބުން ބޯކޮށް ވާރޭވެހި، ބިންގަނޑު ކަނޑައިގެން ދިއުމުގެ ސަބަބުން އެއް އާއިލާއެއްގެ ހަތަރު މީހުން ގެއްލިއްޖެއެވެ.
އައިޗީ ޕްރިފެކްޗާގެ ގަމަގޯރީ ސިޓީގައި ރޭ ދަންވަރު ވެއްޓުނު ގެއެއްގައި ދިރިއުޅުނު ފަސް މީހުންގެ ތެރެއިން ހަތަރު މީހުންނަށް ވީނުވީއެއް ނޭނގޭ ކަމަށް ކަމާބެހޭ އިދާރާތަކުން ބުނެއެވެ. ގެއްލިފައިވާ މީހުންގެ ތެރޭގައި އުމުރުން 70 އަހަރުގެ ދެމަފިރިންނާއި، 40 އަހަރުގެ ފިރިހެނަކާއި 30 އަހަރުގެ އަންހެނަކު ހިމެނެއެވެ.
ތޫފާނުގެ ސަބަބުން ގަޑިއަކު 252 ކިލޯމީޓަރަށް ވައި ގަދަވެފައިވާއިރު، އެއާލައިންތަކުން ގިނަ އަދަދެއްގެ ފްލައިޓްތައް ކެންސަލްކޮށްފައިވެއެވެ. ޖަޕާން އެއާލައިންސްއިން އެކަނި 116 އެތެރޭގެ ފްލައިޓާއި 6 ބައިނަލްއަގުވާމީ ފްލައިޓް ކެންސަލްކުރަން ނިންމާފައިވެއެވެ.
ޖަޕާނުގެ މޫސުމާ ބެހޭ އިދާރާއިން ވަނީ ޝިޒުއޯކާ ސަރަހައްދަށް ބޯކޮށް ވާރޭވެހި ބިންގަނޑު ކަނޑައިގެން ދިއުމުގެ އިންޒާރު ދީފައެވެ. އަދި ތޫފާން ޝަންޝާން މި ހަފުތާގައި ކިއުޝޫއާ ދިމާއަށް ދަތުރުކުރާނެ ކަމަށް ބެލެވެއެވެ.