އިސްރާއީލުން ޣައްޒާގެ ދީރް އަލް ބަލާހު ސަރަހައްދު ހުސްކުރަން އެންގުމާ ގުޅިގެން އދ.ގެ އެހީގެ މަސައްކަތް ގާތްގަނޑަކަށް ހުއްޓިފައިވާކަމަށް އދ.އިން ބުނެފިއެވެ. މި ސަރަހައްދަކީ އދ.ގެ މައިގަނޑު އެހީ ފޯރުކޮށްދޭ ތަނެވެ.
މީހުން ހުސްކުރަން އެންގުމުގެ ސަބަބުން އެހީ ފޯރުކޮށްދޭ 15 ތަނަކަށާއި، 4 ގުދަނަށް އަދި މުވައްޒަފުންނަށް އަސަރުކޮށްފައިވާކަމަށް އދ.ގެ އިންސާނީ އެހީތެރިކަމުގެ އިދާރާ (އޯސީއެޗްއޭ) އިން ބުނެފައިވެއެވެ.
އެހެންނަމަވެސް، އދ.ގެ ފަލަސްތީނު ރެފިއުޖީ އެޖެންސީން އަދިވެސް އޮޕަރޭޝަންތައް ކުރިއަށްގެންދާކަމަށް އދ.ގެ ސެކްރެޓަރީ ޖެނެރަލްގެ ތަރުޖަމާނު ވިދާޅުވިއެވެ.
އިސްރާއީލުން ބުނާގޮތުގައި މި ސަރަހައްދުގައި ތިބި ”ޓެރަރިސްޓުން“ އަދި ހަމާސްގެ ”އިންފްރާސްޓްރަކްޗަރ“ އަމާޒުކޮށް ހަމަލާދެނީއެވެ.
ފަލަސްތީނުގެ ސިއްޙަތު ވުޒާރާއިން ބުނާގޮތުގައި އޮކްޓޫބަރު 7 އިން ފެށިގެން އިސްރާއީލުގެ ހަމަލާތަކުގައި މިހާތަނަށް 40,435 މީހުން ޝަހީދުވެފައިވެއެވެ.