ރާއްޖޭގައި ޑޮލަރުން އާމްދަނީ ލިބޭ ކުންފުނިތަކުން ބޭންކު މެދުވެރިކޮށް ޑޮލަރު މާރުކުރަން މަޖުބޫރުވާ ގޮތަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވާއިދަށް މި ހަފުތާގެ ތެރޭގައި ބަދަލު ގެންނާނެ ކަމަށް ރައީސް ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.
ސަރުކާރު ހިންގާ ޕާޓީ ޕީއެންސީގެ ބައްދަލުވުމެއްގައި ވާހަކަފުޅު ދައްކަވަމުން ރައީސް ވިދާޅުވީ، މި ބަދަލުތަކުގެ ސަބަބުން ރާއްޖޭގައި ޑޮލަރު ހިފެހެއްޓުމަށް ހިތްވަރު ލިބި، ގިނަ ދުވަސްވަންދެން ޑޮލަރު ހިފެހެއްޓިގެންދާނެ ކަމަށެވެ.
މި ބަދަލުތަކުގެ ތެރޭގައި ހިމެނެނީ:
– ޑޮލަރުން އާމްދަނީ ލިބޭ ކުންފުނިތަކުން ބޭންކު މެދުވެރިކޮށް ޑޮލަރު މާރުކުރަން މަޖުބޫރުކުރުން
– ފޮރިން ޑައިރެކްޓް އިންވެސްޓްމަންޓާއި ބިޒްނަސް ޕްރޮފިޓް ޓެކްސްއާ ގުޅޭ ރެގިއުލޭޝަންތަކަށް ބަދަލު ގެނައުން
– ޑޮލަރުން އާމްދަނީ ލިބޭ ކުންފުނިތަކުން އިމްޕޯޓް ޑިއުޓީ ޑޮލަރުން ދެއްކުމަށް ލާޒިމުކުރުން
– އެ ކުންފުނިތަކުގެ މުވައްޒަފުންގެ ޕެންޝަން ފައިސާ ޑޮލަރުން ދެއްކުމަށް ލާޒިމުކުރުން
ރައީސް މުއިއްޒު ވިދާޅުވީ މި ބަދަލުތަކާ ގުޅިގެން ބައެއް މީހުން ހިތްހަމަނުޖެހުނަސް، ސަރުކާރުން ކަންކަން ކުރިއަށް ގެންދާނީ ރައްޔިތުންނަށް ފައިދާވާ ގޮތަށް ކަމަށެވެ. އަދި މި ބަދަލުތަކުގެ ސަބަބުން މަނީ އެކްސްޗޭންޖުތައް ބޭންކިންގ ނިޒާމާ ގުޅި، ޑޮލަރު ރޭޓް މައްޗަށް ދިއުން ހުއްޓުވޭނެ ކަމަށް އެ މަނިކުފާނު ވިދާޅުވި އެވެ.