އިޒްރޭލުގެ އަނިޔާވެރި ހަމަލާއެއްގައި، މުޙައްމަދު އަބޫ އަލް ޣުމްސާންގެ އަނބިމީހާއާއި އެއްމާބަނޑު ދެ ދަރިން ޝަހީދުވެއްޖެއެވެ. މި ހިތާމަވެރި ހާދިސާ ހިނގީ އަބޫ އަލް ޣުމްސާން ތިން ދުވަސް ކުރިން އުފަންވި ދެ ދަރިންގެ އުފަންދުވަހުގެ ސެޓްފިކެޓް ނަގަން ގޮސް ހުއްޓައެވެ.
”އެ ކުދިން އުފަންވުމުގެ އުފާ ފާޅުކޮށްލާނެ ފުރުސަތެއް ވެސް ނުލިބުނު. މިއީ އެ ކުދިން އަދި ނުވެސް ލައްވާ ހުރި އަންނައުނު,“ ހުސްނުވެ އޮތް ނެޕީ ޕެކެޓެއް ދައްކާލަމުން އަބޫ އަލް ޣުމްސާން ހިތާމައާއެކު ބުންޏެވެ.
”މި ނެޕީ ވެސް ހޯދީ ވަރަށް ހާލުން. ޣައްޒާއިން ނެޕީ ހޯދަން ތިން މަސް ދުވަހު މަސައްކަތްކުރިން,“ އިޒްރޭލުގެ ހަމަލާތަކާ ހެދި އަސާސީ ތަކެތި މުޅިންހެން ހުސްވެފައިވާ ޣައްޒާގެ ހާލަތު ސިފަކޮށްދެމުން އޭނާ ވިދާޅުވިއެވެ.
އަބޫ އަލް ޣުމްސާން، ފާމަސިސްޓެއް ކަމަށްވާ އޭނާގެ އަނބިމީހާ ޖުމާނާއާ ކައިވެނިކުރީ މިދިޔަ އަހަރުގެ ޖުލައި މަހުއެވެ. އޮކްޓޫބަރު 7 ގައި އިޒްރޭލުން ޣައްޒާއަށް ހަމަލާތައް ދޭން ފެށުމާއެކު، ޖުމާނާއަށް ޖެހުނީ މާބަނޑު ހާލުގައި އިނދެ، ހަމަލާތަކުން ސަލާމަތްވާން އެއްތަނުން އަނެއް ތަނަށް ދުވާށެވެ. އެއްމާބަނޑު ދެ ކުދިންނަށް ބަލިވެއިން އިރު ވެސް ބަނޑަށް ހަތް މަސް ވަންދެން ވެސް އޭނާ ބޭނުންވީ ހޮސްޕިޓަލްތަކުގައި ހިލޭސާބަހަށް ޚިދުމަތްކޮށްދޭށެވެ.
”ހަމަލާތައް ފެށުނީއްސުރެ ކޮންމެ ދުވަހަކު ވެސް އަހަރެން ހުންނަނީ ބިރުން. އަންހެނުން ބައިގެން ހިނގައިދާނެ ކަމުގެ ބިރު އަބަދުވެސް އޮތް,“ އަބޫ އަލް ޣުމްސާން ވިދާޅުވިއެވެ. ”އަހަރެމެންގެ ރައްޓެހިން، އާއިލާގެ މީހުން އަދި ވަރަށް ގާތް މީހުން މަރުވެ ހިނގައްޖެ. އަހަރެމެން ތިބީ ވަރަށް ބޮޑު ހިތްދަތިކަމެއްގައި. ވަރަށް ބިރުން. ސަލާމަތްވާން އެތައް ތަނަކަށް ދެވިއްޖެ.“
އަބޫ އަލް ޣުމްސާން ބުނީ އިޒްރޭލުން ރައްކާތެރި ސަރަހައްދެއް ކަމަށް ކަނޑައަޅާފައިވާ ސަރަހައްދެއްގެ ތެރޭ، އޭނާގެ އަނބިމީހާއަށް އަމާޒުވާ ގޮތަށް ހަމަލާދީ އެފަދަ ގޮތަކަށް މަރާލި ސަބަބެއް އެނގެން ބޭނުންވާ ކަމަށެވެ.
”ހަމަލާ ދޭން އުޅޭ ކަމުގެ އިންޒާރެއް ކުރިއަކުން ނުލިބޭ. އަހަންނަކީ ހަނގުރާމައަކާ ގުޅުން ހުރި މީހެއް ނޫން. އަހަރެމެންނަކީ އާދައިގެ އާންމު ރައްޔިތުން,“ އޭނާ ވިދާޅުވިއެވެ.
އެއްމާބަނޑު ދެ ކުދިންގެ ތެރެއިން ފިރިހެން ކުއްޖާއަށް އާސިރު އަދި އަންހެން ކުއްޖާއަށް އައިސަލްގެ ނަން ރަސްމީކޮށް ކިޔައި، އަނބިމީހާއަށް އުފަންދުވަހުގެ ސެޓްފިކެޓް ދައްކާލާނެ ފުރުސަތެއް އޭނާއަކަށް ނުލިބުނެވެ.
”އުފަންދުވަހުގެ ސެޓްފިކެޓް ހެދި ދުވަހުގެ އެ ކުދިންގެ މަރުގެ ސެޓްފިކެޓާއި ދަރިންގެ މަންމަގެ މަރުގެ ސެޓްފިކެޓް ވެސް ހައްދަން ޖެހުނު,“ އަބޫ އަލް ޣުމްސާން ހިތާމައާއެކު ބުންޏެވެ.
ގެދޮރު ގެއްލި ހާލުގައި ޖެހުމުން، އަބޫ އަލް ޣުމްސާންއަށް އިއްޔެ ޖެހުނީ އިޒްރޭލުން ރައްކާތެރި ސަރަހައްދެއްގެ ގޮތުގައި ކަނޑައަޅާފައިވާ އަލް މަވާސީގެ ޓެންޓެއްގައި، އޭނާގެ ދެ ދަރިން ބޭނުންވެސް ނުކޮށް ހުރި ހެދުންތަކާ އެކު ގޮސް ހުންނާށެވެ.
މި ހާދިސާއަކީ ޣައްޒާގައި ހިނގަމުންދާ އަނިޔާވެރި ހަމަލާތަކުގެ އެއް މިސާލެވެ. ބައިނަލްއަޤްވާމީ މުޖުތަމަޢުން މި ހަމަލާތައް ކުށްވެރިކޮށް، ވަގުތުން ހުއްޓުވުމަށް ގޮވާލާފައިވީ ނަމަވެސް، މިފަދަ ހިތާމަވެރި ހާދިސާތައް ދަނީ ތަކުރާރުވަމުންނެވެ.
އދ. ގެ އިންސާނީ ޙައްޤުތަކާބެހޭ ކޮމިޝަނަރު ވޮލްކަރ ޓުރްކް ވިދާޅުވެފައިވަނީ، މި ހަމަލާތަކުގައި އާންމު ރައްޔިތުންނާއި މަދަނީ ވަސީލަތްތަކަށް އަމާޒުކޮށް ދެވޭ ހަމަލާތަކަކީ ބައިނަލްއަޤްވާމީ އިންސާނީ ޤާނޫނުތަކުގެ ދަށުން ކުށްވެރިވާނެ ޢަމަލުތަކެއް ކަމަށެވެ.