ބަންގްލަދޭޝްގެ ކުރީގެ ބޮޑުވަޒީރު ޝެއިޚް ހަސީނާގެ މައްޗަށް މަރުގެ ދަޢުވާއެއް އުފުލައިފިއެވެ. މި ދަޢުވާ އުފުލާފައިވަނީ މިދިޔަ ޖުލައި މަހު ފުލުހުން ބަޑިޖެހުމުގެ ހާދިސާއެއްގައި ފިހާރައެއްގެ ވެރިއަކު މަރުވުމާ ގުޅިގެންނެވެ.
މި މައްސަލަ ހުށަހަޅާފައިވަނީ ވެރިރަށް ދާކާގެ މުހައްމަދްޕޫރު ސަރަހައްދުގެ ރައްޔިތެއް ކަމަށްވާ އަމީރު ހަމްޒާ ޝާތިލް، ދާކާ މެޓްރޮޕޮލިޓަން މެޖިސްޓްރޭޓް ކޯޓަށެވެ. ހަސީނާގެ އިތުރުން އިތުރު 6 މީހުންގެ މައްޗަށްވެސް މި މައްސަލައިގައި ތުހުމަތުކޮށްފައިވެއެވެ.
މައްސަލައިގައި ބުނެފައިވާ ގޮތުގައި ޖުލައި 19 ވަނަ ދުވަހު މުހައްމަދްޕޫރުގެ ބަސީލާ ސަރަހައްދުގައި ދަރިވަރުން ސުލްހަވެރި ހިނގާލުމެއް ކުރަމުންދަނިކޮށް ފުލުހުން ބަޑިޖަހަން ފެށިއެވެ. މި ހާދިސާގައި އެ ސަރަހައްދުގެ ފިހާރައެއްގެ ވެރިޔާ އަބޫ ސައީދު މަގު ހުރަސްކުރަމުން ދަނިކޮށް ބޮލަށް ވަޒިން ޖެހި އެތަނުގައި މަރުވިއެވެ.
މައްސަލަ ހުށަހެޅި ފަރާތުން އިތުރަށް ބުނެފައިވަނީ ކުރީގެ ބޮޑުވަޒީރު ހަސީނާ ތަކުރާރުކޮށް ކޯޓާ އިސްލާހުކުރުމުގެ ހަރަކާތުގެ މައްޗަށް ހަރުކަށި ފިޔަވަޅުތަކެއް އެޅުމަށް އަމުރުކުރި ކަމަށެވެ.
މި މައްސަލަ ހުށަހެޅިފައިވަނީ ހަސީނާ އިންޑިއާއަށް ފިލުމަށްފަހުގައެވެ. އޭނާ އިންޑިއާއަށް ފިލީ ޖުލައި 16 އިން ފެށިގެން ހިނގި ސަރުކާރާ ދެކޮޅު މުޒާހަރާތަކުގައި 580 އަށްވުރެ ގިނަ މީހުން މަރުވުމާ ގުޅިގެންނެވެ.
މިހާރު ބަންގްލަދޭޝްގައި ވަނީ ވަގުތީ ސަރުކާރެއް އެކުލަވާލާފައެވެ. މި ސަރުކާރު ހިންގުމަށް ހުވާކުރައްވާފައިވަނީ ނޯބަލް އިނާމު ލިބިވަޑައިގެންފައިވާ މުޙައްމަދު ޔޫނުސްއެވެ.