ޕީސީބީއެސްއިން ނެރުނު ބަޔާނެއްގައި ބުނެފައިވާ ގޮތުގައި، 2023 ވަނަ އަހަރުގެ އޮކްޓޯބަރު 7 އިން ފެށިގެން އިސްރާއީލުގެ ހަމަލާތަކުގައި 39،000 އަށްވުރެ ގިނަ މީހުން ވަނީ މަރުވެފައެވެ. މީގެ ތެރެއިން 24 އިންސައްތައަކީ ޒުވާނުންނެވެ.
އެންމެ ފަހުން ހިނގި އެއް ހާދިސާގައި، ހޮނިހިރު ދުވަހު އިސްރާއީލުގެ ސިފައިންގެ ހަނގުރާމަ މަތިންދާބޯޓަކުން ޣައްޒާ ސިޓީގެ ދަރަޖް ސަރަޙައްދުގައި ހުރި ތަބާއީން ސްކޫލުގައި ފަތިސް ނަމާދު ކުރަމުންދިޔަ ފަލަސްޠީނުގެ މަދަނީ ރައްޔިތުންނަށް ހަމަލާދީ 100 އަށްވުރެ ގިނަ މީހުން މަރާލައި، އެތައް ބަޔަކު ޒަޚަމްކޮށްލައިފިއެވެ.
މީގެ އިތުރުން، ބަނޑުހައިހޫނުކަމުގެ ސަބަބުން 34 މީހުން މަރުވެފައިވާއިރު، ކާބޯތަކެތި މަދުވުމާއި ނުލިބުމުގެ ސަބަބުން ގާތްގަނޑަކަށް 3،500 ކުދިން މަރުވުމުގެ ނުރައްކަލާ ކުރިމަތިވެފައިވެއެވެ.
ޣައްޒާގައި ޒަޚަމްވެފައިވާ މީހުންގެ ތެރެއިން 70 އިންސައްތައަކީ އަންހެނުންނާއި ކުޑަކުދިންނެވެ. އަދި 10،000 އަށްވުރެ ގިނަ މީހުން އަދިވެސް ވަނީ ގެއްލިފައެވެ. މީގެ އިތުރުން ގާތްގަނޑަކަށް ދެ މިލިއަން މީހުން ވަނީ ނިކަމެތިކަމާ ކުރިމަތިވެފައެވެ.
އިސްރާއީލުން އަރައިގަނެފައިވާ ވެސްޓް ބޭންކުގައި އިސްރާއީލުގެ ހަމަލާތަކުގައި 620 ފަލަސްޠީނުގެ މީހުން މަރުވެފައިވާ ކަމަށް އެ ބިއުރޯއިން ބުނެފައިވެއެވެ. މީގެ ތެރެއިން 75 އިންސައްތައަކީ 30 އަހަރުން ދަށުގެ މީހުންނެވެ.