ހައިރާންވާފަދަ ބަދަލަކާއެކު، ބިލާލް ”ރިމެމްބަރ ދަ ނޭމް“ މުޙައްމަދު ވަނީ ޔޫއެފްސީ ވެލްޓަރވެއިޓް ޗެމްޕިއަންކަން ހޯދާފައެވެ. މި މަޤާމު އޭނާ ހޯދީ 27 ޖުލައި 2024 ގައި އިނގިރޭސިވިލާތުގެ މެންޗެސްޓަރުގައި ބޭއްވުނު ލިއޯން އެޑްވަރޑްސްއާ އެކު ކުޅުނު ގިނަ ބަޔަކު އިންތިޒާރުކުރި ރީމެޗެއްގައެވެ. މި ކާމިޔާބީއަކީ މުޙައްމަދުގެ ކެރިއަރުގައި ވަރަށް މުހިންމު ހަނދާނެކެވެ. މީގެ ކުރިން 2021 ގައި އެޑްވަރޑްސްއާ އެކު ކުޅުނު މެޗެއް ނިމިފައިވަނީ ލޮލަށް ލިބުނު އަނިޔާއެއްގެ ސަބަބުން ނަތީޖާއެއް ނުނިކުމެއެވެ.
36 އަހަރުގެ މުޙައްމަދު، އޭނާގެ ފަލަސްތީނު ނަސްލާ ބެހޭ ގޮތުން އަބަދުވެސް ވާހަކަދައްކަމުން އައި މީހެކެވެ. އޭނާ ވަނީ މި ޗެމްޕިއަންކަން ފަލަސްތީނަށް ހަދިޔާކޮށްފައެވެ. އޭނާގެ ކާމިޔާބީގެ ތަޤްރީރުގައާއި ޝިކާގޯގެ ރަށްވެހި އަވަށެއްގައި ބޭއްވުނު ޕެރޭޑުގައި އޭނާ ވަނީ އޭނާގެ އަސްލާ މެދު ފަޚުރުވެރިވާކަމާއި އޭނާގެ ވަޠަނާ އެކު އެއްބައިވަންތަކަން ފާޅުކޮށްފައެވެ. އޭނާގެ ކާމިޔާބީ ވަނީ ފަލަސްތީނު މުޖުތަމަޢުގެ ގިނަ ބަޔަކަށް އުންމީދާއި ހިތްވަރުގެ ނިޝާނަކަށް ވެފައެވެ.
ޓީއާރްޓީ ވޯލްޑްގެ ސުމައްޔާ ޠޯބާއާއެކު ކުރެވުނު ޚާއްޞަ އިންޓަވިއުއެއްގައި، މުޙައްމަދު އޭނާގެ ދަތުރުގެ މައްޗަށް ވިސްނާލިއެވެ. އޭނާ ކުރިމަތިލާންޖެހުނު ގޮންޖެހުންތަކާއި ހުރަސްތަކުގެ ވާހަކަ ކިޔައިދިނެވެ. މީގެ ތެރޭގައި ގިނަ އޮޕަރޭޝަންތަކާއި އެޑްވާޑްސްއާ ދެކޮޅަށް ކުޅުނު ފުރަތަމަ މެޗުގެ ނަތީޖާ ބާޠިލުވުން ހިމެނެއެވެ. އޭނާ ބާރުއަޅައި ބުނީ ނަފްސާނީ އަދި ރޫޙާނީ ގޮތުން ވަރުގަދަވުމުގެ މުހިންމުކަމުގެ މައްޗަށެވެ. އަދި އޭނާގެ ކާމިޔާބީގެ ފަހަތުގައިވަނީ އޭނާގެ ކެތްތެރިކަމާއި އީމާންތެރިކަން ކަމަށް ބުންޏެވެ. މުޙައްމަދު ހާމަކުރި ގޮތުގައި އޭނާގެ މި ކާމިޔާބީއަކީ އަމިއްލަ ލަނޑުދަނޑިތައް ހާސިލުކުރުމުގެ އިތުރުން އޭނާއާމެދު ޝައްކުކުރި މީހުންނަށް ޖަވާބެއް ދިނުމެވެ.
މި ޗެމްޕިއަން ވާހަކަދެއްކީ ޣައްޒާގައި މިހާރު ކުރިމަތިވެފައިވާ ހާލަތާ ބެހޭގޮތުންވެސް މެއެވެ. އަދި މިކަމަށް ބައިނަލްއަޤްވާމީ ސަމާލުކަމާއި ފިޔަވަޅު އެޅުމަށް ގޮވާލިއެވެ. އޭނާ ފާހަގަކުރީ އޭނާގެ އަމިއްލަ ތަނަވަސް ހާލަތާއި ފަލަސްޠީނުގެ ރައްޔިތުން ދިރިއުޅެމުންދާ ނިކަމެތި ހާލަތާ ހުރި ބޮޑު ތަފާތެވެ. އަދި އޭނާގެ މަޤާމު ބޭނުންކޮށްގެން އޭނާގެ މުޖުތަމަޢުއަށް ވަކާލާތުކުރުމަށް އޮތް އަޒުމުގެ މައްޗަށް ބާރުއެޅިއެވެ.
މުޙައްމަދު ސިފަކުރިގޮތުގައި ނަސްލު ހަލާކުކުރުން ނިމުމަކަށް ގެނައުމަށް ހަރުދަނާ ފިޔަވަޅުތަކެއް އަޅަންޖެހެއެވެ. އަދި އޭނާ ވަނީ ފައިޓަރުކަމަށް އަރަން ބޭނުންވާ ފަރާތްތަކަށް ނަސޭހަތްތެރިވެފައެވެ. އޭގައި އޭނާ ބާރުއަޅާފައިވަނީ ނަފްސާނީ ގޮތުން ވަރުގަދަވުމާއި ދެމެހެއްޓެނިވި ގޮތެއްގައި ކަމަށް ވަފާތެރިވުމުގެ މުހިންމުކަމަށެވެ.
މުޙައްމަދުގެ މި ކާމިޔާބީއަކީ ހަމައެކަނި އަމިއްލަ ކާމިޔާބީއެއްގެ ގޮތުގައި ފާހަގަކުރެވޭ ކަމެއް ނޫނެވެ. އެއީ ފަލަސްޠީނާ އެކު އެއްބައިވަންތަކަން ދެއްކުމުގެ ގޮތުން ދެވުނު ވަރުގަދަ މެސެޖެކެވެ. މިއިން ދައްކުވައިދެނީ ކުޅިވަރުވެރިންނަށް އެމީހުންގެ މަޤާމު ބޭނުންކޮށްގެން ވަކާލާތުކުރުމާއި ބަދަލު ގެނައުމަށް ކުރެވިދާނެ ފުޅާ ދާއިރާގެ އަސަރެވެ.