ގަތަރުގެ އަމީރު ހިޒް ހައިނަސް ޝެއިޚް ތަމީމް ބިން ހަމަދު އަލް ތާނީއަށް، އެމެރިކާގެ ރައީސް ޑޮނަލްޑް ޓްރަމްޕް ބުދަ ދުވަހު ފޯނުން ގުޅުއްވައި، މެދުއިރުމަތީގެ މަސްރަޙުގައި ހިނގަމުންދާ އެންމެ ފަހުގެ ކަންތައްތަކާ ގުޅޭގޮތުން މުހިންމު މަޝްވަރާތަކެއް ކުރައްވައިފިއެވެ.
ގަތަރުގެ އަމީރީ ދިވާނުން ނެރުނު ބަޔާނެއްގައި ބުނެފައިވާ ގޮތުގައި، މި ފޯނު ކޯލަކީ ސަރަހައްދުގައި މިހާރު ހިނގަމުންދާ ސިޔާސީ އަދި ސަލާމަތީ ގޮންޖެހުންތަކާ ގުޅޭގޮތުންނާއި، ބައިނަލްއަގްވާމީ މަސްރަޙުގައި ހުރި ކަންބޮޑުވުންތައް ކުޑަކޮށް ހަމަޖެހުން ގާއިމުކުރުމަށް ކުރެވޭ މަސައްކަތްތަކުގެ ދަށުން ކުރެވުނު މުހިންމު މުއާމަލާތެކެވެ.
މި މަޝްވަރާތަކުގައި ގަތަރުގެ އަމީރު ޝެއިޚް ތަމީމް ވަނީ ސަރަހައްދީ ސަލާމަތާއި ހަމަޖެހުން ވަރުގަދަކުރުމަށްޓަކައި ސިޔާސީ އަދި ޑިޕްލޮމެޓިކް ހައްލުތަކަށް އިސްކަންދިނުމުގެ މުހިންމުކަން ފާހަގަކުރައްވާފައެވެ. އަދި ސަރަހައްދުގެ ނުތަނަވަސްކަން އިތުރުވިޔަ ނުދީ ހިފެހެއްޓުމަށްޓަކައި ހުރިހާ ފަރާތްތަކެއްގެ މެދުގައި މަޝްވަރާގެ ދޮރު ހުޅުވިފައި ބެހެއްޓުމަކީ ކޮންމެހެން ބޭނުންތެރި ކަމެއް ކަމަށް އަމީރު ވިދާޅުވިއެވެ.
މީގެ އިތުރުން، މިހާރު ދިމާވެފައިވާ މައްސަލަތަކަށް ދާއިމީ ހައްލެއް ހޯދުމަށް މަޝްވަރާތައް މެދުނުކެނޑި ކުރިއަށް ގެންދިއުމާ ގުޅޭގޮތުން ދެ ބޭފުޅުން ވާހަކަފުޅު ދެއްކެވިއެވެ. މިގޮތުން ކަނޑުގެ ސަލާމަތާއި ރައްކާތެރިކަން ކަށަވަރުކުރުމާއި، ބައިނަލްއަގްވާމީ ވިޔަފާރި އާއި ހަކަތަ ފޯރުކޮށްދޭ ސްޓްރެޓެޖިކް މަގުތައް އޮމާންކަމާއެކު ކުރިއަށް ގެންދިއުމުގެ މުހިންމުކަމުގެ މައްޗަށް މި ކޯލުގައި އަލިއަޅުވާލާފައިވެއެވެ.
މި ބައްދަލުވުމަކީ މެދުއިރުމަތީގެ ސަލާމަތާއި ދުނިޔޭގެ އިގްތިސާދީ ދުވެލި ދެމެހެއްޓުމަށްޓަކައި ގަތަރާއި އެމެރިކާއިން ކުރަމުންދާ މަސައްކަތްތަކުގެ ތެރެއިން ކުރެވުނު މުހިންމު މަޝްވަރާއެކެވެ.
ހަސަން އަރީން (އެޑީ)