ވޮޝިންޓަން އާއި ތެހެރާނުން މެސެޖުތައް ބަދަލުކުރަމުންދާއިރު، ރޫބިއޯ ދައްކަވަނީ ”ރަނގަޅު ނިޝާންތަކެއް“

”މިއަދުވެސް އިސްރާއީލުގެ ސިފައިންގެ ރޫހުގައި ސިފައިންގެ ޠަބީޢަތާއި މިލިޝިއާއާ ދެމެދު ވަކި މިންވަރަކަށް ޓެންޝަން އުފެދިފައިވާކަން ހާމަވެގެންދެއެވެ.“

ޣައްޒާ / އިސްރާއީލު: އިސްރާއީލުން ޣައްޒާގެ މުސްލިމުންނާ ދެކޮޅަށް ހިންގަމުންދާ ނަސްލު ނައްތާލުމުގެ ހަނގުރާމައިގެ ތެރޭގައި، އެ ގައުމުގެ އަސްކަރިއްޔާގެ ތެރޭގައި އޮތް ބައިބައިވުންތަކާއި، ކޮންޓްރޯލުން ނެއްޓިފައިވާ މިންވަރު ހާމަވާ ފަދަ ނުރައްކާތެރި ހާދިސާތަކެއް ފެންމަތިވެއްޖެއެވެ. ޖުލައި 29، 2024 ގައި ހިނގި ހާދިސާއެއްގައި، އިސްރާއީލުގެ ”ސްޑޭ ޓެއިމަން“ ޖަލުގެ ތެރޭގައި ތިބި އިސްތިއުމާރީ ސިފައިން ވަނީ އެމީހުން ހައްޔަރުކުރަން ދިޔަ އަސްކަރީ ފުލުހުންނާ ދެކޮޅަށް ތެދުވެފައެވެ.

މި ކުރިމަތިލުން ހިނގަން މެދުވެރިވީ، ފަލަސްތީނުގެ ގައިދީއަކަށް ބޮޑެތި އަނިޔާތަކެއްކޮށް ރޭޕްކުރުމުގައި ބައިވެރިވި ޖަލުގެ ގާޑުންނާއި ސިފައިން ހައްޔަރުކުރަން އުޅުމުންނެވެ. ނަމަވެސް، ހައިރާންވާންޖެހޭ ކަމަކީ މި ލާއިންސާނީ ޖަރީމާ ހިންގި ސިފައިންނަށް އިސްރާއީލުގެ ކަނާތުފިޔައިގެ ސިޔާސީ ޕާޓީތަކާއި ވަޒަންވެރިންގެ ފަރާތުން ބޮޑު ތާއީދެއް ލިބުމެވެ. ހައްޔަރުކުރި ސިފައިންނަށް ހިތްވަރު ދިނުމަށްޓަކައި ވަޒަންވެރިން ވަނީ ”ބެއިޓް ލިޑް“ އަސްކަރީ ކޯޓަށް ގަދަކަމުން ވަދެގަނެފައެވެ. އަދި އިސްރާއީލުގެ ގައުމީ ސަލާމަތާ ބެހޭ މިނިސްޓަރު އިޓަމާ ބެން ގްވިރް ވަނީ އެ ޖަރީމާ ހިންގި ސިފައިންނަކީ ”އަހަރެމެންގެ އެންމެ މޮޅު ބަޠަލުން“ ކަމަށް ސިފަކުރައްވައި، އެމީހުންގެ ދިފާއުގައި ވާހަކަދައްކަވާފައެވެ.

މި ހާދިސާއަކީ އެކަހެރި ކަމެއް ނޫން ކަމަށާއި، 2023 އޮކްޓޯބަރު 7 ގެ ފަހުން އިސްރާއީލު ސިފައިންގެ ތެރޭގައި ޑިސިޕްލިން ގެއްލި، ކޮންޓްރޯލުން ނެއްޓިފައިވާ މިންވަރު މިކަމުން ހާމަވާ ކަމަށް މުހައްލިލުން ބުނެއެވެ. ޣައްޒާއާއި ލުބުނާނުގެ ދެކުނުގައި ހަރަކާތްތެރިވާ ޔުނިޓްތަކުން އާންމުންގެ މުދާ ފޭރުމާއި، ހުއްދަ ނެތި އާންމުން ހަނގުރާމައިގެ މައިދާނަށް ވެއްދުމާއި، އަދި އަސްކަރީ މުވައްޒަފުން އަމިއްލަ ޖާސޫސީ ހަރަކާތްތަކުގައި ބައިވެރިވުން ފަދަ ގިނަ މައްސަލަތަކެއް ވަނީ ފެންމަތިވެފައެވެ.

މިލިޝިއާ ޑީއެންއޭ އަދި ތާރީޚީ ސަގާފަތް

މިފަދަ ނުރައްކާތެރި ސުލޫކުތައް ސިފައިންގެ ތެރޭގައި އަށަގަނެފައިވާ ސަބަބުތަކާ ބެހޭގޮތުން އިސްރާއީލުގެ ކުރީގެ ނޭޝަނަލް ސެކިއުރިޓީ އެޑްވައިޒަރު ޔާކޯވް އަމިޑްރޯރ ލިޔުއްވާފައިވާ ގޮތުގައި، އިސްރާއީލުގެ ސިފައިންގެ ބިންގާ އެޅިފައިވަނީ 1948 ގެ ކުރިން އުޅުނު ހަތިޔާރު އެޅި ހަތަރު ޖަމާއަތެއްގެ މައްޗަށެވެ. އެއީ ހަގަނާ، ޕަލްމާޗް، އިރްގުން އަދި ސްޓަރން އެވެ. އޭނާ ވިދާޅުވާ ގޮތުގައި، އިސްރާއީލުގެ އެއްގަމު ފައުޖުތަކުގައި އަދިވެސް އޮތީ އެ ”މިލިޝިއާ ސަގާފަތް“ ކަމަށާއި، ހަރުކަށި އުސޫލުތަކަށްވުރެ ބޮޑަށް ފަރުދީ އިސްނެގުމާއި އިމްޕްރޮވައިޒޭޝަނަށް އިސްކަންދިނުމުގެ ސަބަބުން ޑިސިޕްލިން ދެމެހެއްޓުމަށް ހުރަސްއެޅެއެވެ.

ޖަވާބުދާރީވުމުގެ ނިޒާމު ފޭލްވުން
ސްޑޭ ޓެއިމަން ޖަލުގައި ހިންގި ޖަރީމާތަކާ ގުޅިގެން ހިންގި ތަހުގީގަށް ހުރަސްއެޅުމަށް ”ފޯސް 100“ ކައުންޓަރ ޓެރަރިޒަމް ޔުނިޓުގެ ސިފައިން މޫނު ނިވާކޮށްގެން ނުކުމެ، ތަހުގީގު ކުރާ ފަރާތްތަކަށް ހަމަލާދީފައިވެއެވެ. މިއީ އަސްކަރިއްޔާގެ ތެރޭގައި ގާނޫނީ ބާރުވެރިކަން ގެއްލިފައިވާ ކަމުގެ ސާފު ހެކިބަހެކެވެ. އެންމެ ފަހުން، ގައިދީއަށް ހަމަލާދިން މައްސަލައިގައި ހައްޔަރުކުރި ސިފައިން ވަނީ ދޫކޮށްލާފައެވެ.

މީގެ އިތުރުން، ލުބުނާނުގެ ދެކުނުގައި ހުއްދަ ނެތި އާސާރީ ތަނަކަށް ދިޔަ 71 އަހަރުގެ އާކިއޮލޮޖިސްޓް ޒީވް އެރްލިޗް މަރުވި ހާދިސާއިން ވެސް ހާމަވަނީ، އޮޕަރޭޝަނަލް ގަވާއިދުތަކަށް ކޮމާންޑަރުން އިހުތިރާމް ނުކުރާ މިންވަރެވެ. މި ހާދިސާއާ ގުޅިގެން ގޯލާނީ ބްރިގޭޑްގެ ބައެއް އިސްވެރިންނަށް ފިޔަވަޅު އަޅަން ޖެހުނެވެ.