އުޑުމަތި ބަނަވެ، ކަޅުވިލާތަކުން މުޅި ފަޒާ ވަނީ ބައްދާލާފައެވެ. ބިރުވެރިކަމާއި ނާމާންކަމުން ފުރިގެންވީ އެ ރޭގެ ހަމަހިމޭންކަން ފޫއަޅުވާލަނީ ކުއްލިއަކަށް ޖަހާލާ ބާރު ގުގުރުމާއި، މުޅި ދުނިޔެ އަލިކޮށްލާ ފަދަ ގަދަ ވިދުވަރުގެ އޮލިއަލިންނެވެ. ވާރޭގެ ތިކިތައް ބޯކޮށް އޮހެމުންދާއިރު، މަގުމަތީގައި އެއްވެސް ދިރޭ ފުރާނައެއްގެ ހިލަމެއް ނެތެވެ. ނަމަވެސް، އެ ފަޅު މަގުމަތީގައި އިސްޖަހާލައިގެން ހުރީ ކައިލްއެވެ.
ކައިލްގެ ހަށިގަނޑުގައި ބޯކޮށް އޮހެމުންދިޔަ ވާރޭގެ ތިކިތައް ޖެހެމުންދިޔަ ނަމަވެސް، އޭނާއަށް އެކަމުގެ އިހުސާސެއް ނުވެއެވެ. އޭނާގެ ސިކުނޑީގައި އެނބުރެމުން ދަނީ އޭނާގެ މާޒީއެވެ. އުފާވެރި ދިރިއުޅުމެއް އުޅެމުންދިޔަ ކައިލްގެ މާޒީ އެފުށް މިފުށަށް ޖެހިގެން ދިޔަ ގޮތް ހިތަށް އެރުމުން މިއަދުވެސް އޭނާގެ ލޮލުން ކަރުނަ ހިލެއެވެ. އެ ހިތްދަތި ހާދިސާތައް ހިނގާފައިވަނީ މީގެ އަހަރުތަކެއް ކުރިން ކަމަށް ވިޔަސް، މިއަދު ވެސް ކައިލްއަށް ހީވަނީ އެއީ ހަމަ މިއަދު ހިނގަމުންދާ ކަންތައްތަކެއް ހެންނެވެ.
”މާޒީއަކީ އަނބުރާ އަންނާނެ އެއްޗެއް ނޫން،“ މީހުން އެހެން ބުންޏަސް، ކައިލްއަށް އިހުސާސް ކުރެވެނީ މުޅިން ތަފާތު ގޮތަކަށެވެ. އޭނާއަށް ހީވަނީ މާޒީގެ ކޮންމެ ހިތްދަތި ހަނދާނެއް އޭނާގެ ފަހަތުން އައިސް މިއަދުވެސް އޭނާ ވަށާލާފައިވާ ހެންނެވެ. އުޑުމަތިން ވިދުވަރެއް ބަބުޅާލާ ކޮންމެ ފަހަރަކު، ބިރުން ކައިލްގެ ލޯ މެރިގެންދެއެވެ. އެ އަލިކަމުގެ ތެރެއިން އޭނާއަށް ފެންނަނީ ބާކީވެފައިވާ އޭނާގެ ދިރިއުޅުމުގެ ސޫރައެވެ. މިއީ މިއަދު ކައިލްގެ ހަަނަފަސް ދިރިއުޅުމެވެ.
ތެމި ފޯވެގެން ގެއަށް ވަދެގެން އައި ކައިލް ފެނުމުން، ސޯފާގައި އިން އޭނާގެ މަންމަ ޒަހުރިއްޔާ ދަރިފުޅާ ދިމާއަށް ބަލާލިއެވެ. ”ދަރިފުޅާ! ހާދަހާ ލަހަކުން ތިއައީ. ތެމިގެން ތިހުރީ ކީއްވެ؟“ ކަންބޮޑުވުމާއެކު ޒަހުރިއްޔާ ސުވާލު ކުރިއެވެ. ނަމަވެސް ކައިލްގެ ފަރާތުން އެއްވެސް ޖަވާބެއް ނުލިބުނެވެ. މަންމަގެ މޫނަށް ބަލާލުމެއް ނެތި، ހިމޭންކަމާއެކު އޭނާ ހިނގައިގަތީ އަމިއްލަ ކޮޓަރިއާ ދިމާއަށެވެ. ކައިލްގެ އެ ހިމޭންކަމާއި މާޔޫސްކަން ފެނި، ޒަހުރިއްޔާގެ މޫނުމަތިން ފުން ހިތާމައެއް ފާޅުވެގެން ދިޔައެވެ. ދަރިފުޅުގެ ހިތުގައި އަނދަމުންދާ އަލިފާން ނިއްވާލާނެ ގޮތެއް އެ މަންމައަކަށް ނޭނގުނެވެ.
ރޭގަނޑުގެ އެ ނާމާންކަން ފާއިތުވެ، އިރު އޭގެ ވާޖިބު އަދާކުރުމަށްޓަކައި ދުނިޔެމައްޗަށް އަލިކަން ފަތުރާލައިފިއެވެ. ރޭގެ ބިރުވެރި ތޫފާނަށްފަހު ފެންނަނީ އުފާވެރި މާހައުލެކެވެ. ގަސްގަހާގެހީގެ ފެހިކަމާއި، ފަތިހުގެ ތާޒާ ވައިރޯޅިތަކުން މުޅި މާހައުލު ވަނީ އާރޯވެފައެވެ. ދޫނިސޫފާސޫފީގެ ހިތްގައިމު އަޑުތަކާއި ހާލާ ކާޅުގެ އަޑުން މުޅި ފަޒާ ގުގުމާލާފައިވާއިރު، ކައިލްގެ ހިތުގައި ނިވެމުންދާ ހުޅުކޮޅަށް އާ ދިރުމެއް ލިބޭނެ ދުވަހަކަށް އޭނާގެ މަންމަ ދަނީ އިންތިޒާރު ކުރަމުންނެވެ.
”ދަރިފުޅާ، ކީއްވެގެންތަ ތިހާ ބޮޑަށް ބަދަލުވީ؟“ ޒަހުރިއްޔާގެ އަޑުގައި ވަނީ އިންތިހާ ދަރަޖައިގެ ކަންބޮޑުވުމެވެ. ކައިލް އިސްޖަހާލައިގެން އިނީ ކާ މޭޒު ދޮށުގައެވެ. ކުރިމަތީގައި ހުރި ތަށިން ސަމުސަލަކުން ކާ އެތިކޮޅު ގަޅުވަމުން ދިޔަ ނަމަވެސް، އޭނާގެ ހިތާއި ސިކުނޑި ވަނީ އެހެން ދުނިޔެއެއްގައެވެ.
ކައިލްގެ ހިތްދަތިކަމުގެ އަސްލަކީ މީގެ ތިން އަހަރު ކުރީގެ އެ ހިތްދަތި ރޭގަނޑެވެ. އޭނާގެ އެންމެ ގާތް އެކުވެރިޔާ އަދި ދިރިއުޅުމުގެ ބައިވެރިޔަކަށް ވާން އުންމީދު ކުރި ޒުވާނާ، ކުއްލި އެކްސިޑެންޓެއްގައި ވަކިވެގެން ދިޔަ ރެއެވެ. އެ ރޭވެސް އޮތީ ހަމަ މިފަދަ ބާރުގަދަ ތޫފާނެކެވެ. ވިދުވަރުގެ އޮލިއަލި ފެންނަ ކޮންމެ ފަހަރަކު ކައިލްގެ ލޯ މެރިގެންދަނީ އެ ހާދިސާގެ ބިރުވެރި މަންޒަރުތައް ސިފަވާތީއެވެ. މިއަދު އޭނާއަކީ ދިރިހުރި ފުރާނައެއް ނަމަވެސް، އެ ހަށިގަނޑުގައި ވަނީ ނިވެމުންދާ ހުޅުކޮޅެއް ފަދަ ބަލިކަށި އުންމީދެކެވެ.
”މަންމާ، އަހަރެން ބޭނުމީ އެކަނިވެލަން،“ ވަރަށް އުނދަގުލުން ކައިލް ބުނެލިއެވެ. އޭނާ ކާ ތަށި ދުރަށް ޖައްސާލުމަށްފަހު ގޮނޑިން ތެދުވިއެވެ.
ޒަހުރިއްޔާ އައިސް ކައިލްގެ ކޮނޑުގައި އަތް ބާއްވާލިއެވެ. ”ދަރިފުޅާ، މާޒީގެ ހިތާމަތަކުގެ ތެރޭގައި ތިހެން ބަންދުވެގެން ހުރުމަކީ ހައްލެއް ނޫން. ދިރިއުޅުމަކީ ކުރިއަށް ދިއުން. ބަލާބަލަ ބޭރަށް، ރޭގެ އެ ބިރުވެރި ތޫފާނަށްފަހު މިއަދު އިރު އެރީ ކިހާ އުޖާލާކޮށް؟“
ކައިލް ކުޑަދޮރުން ބޭރަށް ބަލާލިއެވެ. ގަސްތަކުގެ ފަތްތަކުގައި ހަރުލާފައި ހުރި ފެންތިކިތައް އިރުގެ އަލީގައި ބަބުޅަމުން ދިޔައެވެ. ދޫނިތަކުގެ ފޮނި އަޑު މުޅި ފަޒާގައި ހިފާލާފައިވެއެވެ. އޭނާގެ ހިތުގެ ކޮންމެވެސް ކަނެއްގައި ފޮރުވިފައިވާ އުންމީދުގެ ކުޑަ ކުޑަ ހުޅުކޮޅެއް އަނެއްކާވެސް ފަނޑުގޮތަކަށް ދިއްލެން ފެށި ކަހަލައެވެ.
”މަންމާ… އަހަރެން މަސައްކަތް ކުރާނަން،“ ކައިލް މަޑުމަޑުން ބުނެލިއެވެ. ޒަހުރިއްޔާގެ މޫނުމައްޗަށް ހިނިތުންވުމެއް ވެރިވިއެވެ. އެއީ ގިނަ ދުވަސްތަކަކަށްފަހު އޭނާގެ ދަރިފުޅުގެ ދުލުން އިވުނު އުންމީދީ ބަސްތަކެކެވެ. ނިވެމުން އައި ހުޅުކޮޅު އަލުން ރޯވާން ފަށައިފިކަމުގެ އިހުސާސް އެ މަންމައަށް ކުރެވުނެވެ. ކައިލް ކޮޓަރިއަށް ވަދެ، އޭނާގެ މޭޒުމަތީގައި ހުރި ބާ މޮޅިވެފައިވާ ގަސްތަކަށް ފެންދޭން ފެށިއެވެ. މިއީ އާ ފެށުމެއްގެ ފެށުމެވެ. މާޒީގެ އަނދިރިކަން ފަހަނައަޅައި، އުޖާލާ މުސްތަގުބަލަކަށް އެޅުނު ފުރަތަމަ ފިޔަވަޅެވެ.