އިންޑިއާގެ ރާޖަސްތާނު ސްޓޭޓްގެ ޒުންޒުނޫގައި، މަރުވެފައިވާ ކަމަށް ހީކޮށް މީހަކު އަންދާލަން ތައްޔާރުކުރަނިކޮށް އެ މީހާ ނޭވާލާން ފެށުމުން އަލުން ހޮސްޕިޓަލަށް ގެންގޮސް ފަރުވާ ދިން ނަމަވެސް އިއްޔެ މަރުވެއްޖެއެވެ.
ވާހަކަ ދެއްކުމާއި އަޑުއިވުމުގައި ދަތިތަކެއް ހުރި 25 އަހަރުގެ ރޯހިތާޝް ކުމާރު، ބަލިވެގެން ހޮސްޕިޓަލަކަށް ގެންދިއުމުން އޭނާ މަރުވެފައިވާ ކަމަށް ނިންމީ މިދިޔަ ބުރާސްފަތި ދުވަހުއެވެ. އިންޑިއާގެ މީޑިއާތަކުން ރިޕޯޓްކޮށްފައިވާ ގޮތުގައި އޭނާއަށް އެޕިލެޕްޓިކް ސިޒާއެއް ޖެހިފައިވާ ކަމަށާއި ހޮސްޕިޓަލަށް ގެންދިޔައިރު ވެސް މަރުވެފައިވާ ކަމަށް ޑޮކްޓަރުން ނިންމިއެވެ.
ހޮސްޕިޓަލުގެ ޗީފް މެޑިކަލް އޮފިސަރު ޑީ ސިންގް އޭއެފްޕީއަށް ވިދާޅުވެފައިވަނީ ޑޮކްޓަރަކު އެ މީހާގެ ހަށިގަނޑު މޯޗަރީއަށް ފޮނުވާލީ އެކަމާ ހަވާލުވި ޑޮކްޓަރު ޕޯސްޓްމޯޓަމް ނުހަދައި ޕޯސްޓްމޯޓަމް ރިޕޯޓެއް އަމިއްލައަށް ހެދުމަށް ފަހު ކަމަށެވެ.
ސިންގް ވިދާޅުވި ގޮތުގައި ”ހަށިގަނޑުގައި ރޯކޮށްލުމުގެ ކުޑަ އިރުކޮޅެއް ކުރިން“ ރޯހިތާޝްގެ ހަށިގަނޑު ހަރަކާތްކުރަން ފެށި ކަމަށެވެ. ދެން ގޮސް ބެލި އިރު އޭނާ މަރުނުވާ ކަމަށާއި ނޭވާލަމުން ދިޔަ ކަމަށް ވިދާޅުވިއެވެ. އެ ހިސާބުން އަވަހަށް އޭނާ ހޮސްޕިޓަލަށް ގެންގޮސް ފަރުވާ ދޭން ފެށި ނަމަވެސް އިއްޔެ މަރުވީއެވެ.
މި މައްސަލައާ ގުޅިގެން ހޮސްޕިޓަލުގެ ތިން ޑޮކްޓަރަކު ސަސްޕެންޑްކޮށް މައްސަލަ ވަނީ ތަހުގީގުކުރަން ފަށައިފައެވެ.