އެމެރިކާގެ އިންތިޚާބީ ރައީސް ޑޮނަލްޑް ޓްރަމްޕްގެ މައްޗަށް މިދިޔަ މެއި މަހު ސާބިތުވި ކުށުގެ މައްސަލައިގެ ހުކުމް އިއްވުން މުއްދަތެއް ނެތް ގޮތަށް ފަސްކޮށްފިއެވެ. މި މައްސަލައިގެ ހުކުމް އިއްވުމަށް ކުރިން ތާވަލުކޮށްފައި އޮތީ އަންނަ އަންގާރަ ދުވަހަށެވެ.
މައްސަލަ ބައްލަވާ ފަނޑިޔާރު، ހުއާން މާޗަން ވިދާޅުވެފައިވަނީ ޓްރަމްޕްގެ މައްސަލަ ބާތިލު ކުރުމަށް އަންނަ ޑިސެމްބަރު މަހުގެ ދެ ވަނަ ދުވަހުގެ ކުރިން ލިޔެކިޔުންތައް ހުށަހަޅަން ޖެހޭނެ ކަމަށެވެ. އަދި ޕްރޮސެކިއުޓަރުންނަށް ޖަވާބުދާރީވުމަށް އެއް ހަފުތާ ލިބޭނެ ކަމަށްވެސް މާޗަން ވިދާޅުވިއެވެ.
ޓްރަމްޕްގެ ވަކީލުން ބުނެފައިވަނީ އެމަނިކުފާނުގެ މައްޗަށް އިއްވާފައިވާ ހުކުމް ބޭރުކޮށްލަން ޖެހޭ ކަމަށާއި ރިޔާސީ އިމްތިޔާޒު ޓްރަމްޕަށް ލިބެން ޖެހޭނެ ކަމަށެވެ. އަދި ހުކުމް އިއްވައިފި ނަމަ ނަމަ ރައީސް ކަމުގެ މަސްއޫލިއްޔަތަށް ހުރަސް އެޅޭނެ ކަމަށް ވެސް ވަކީލުން ވިދާޅުވެފައިވެއެވެ.
މި މައްސަލައިގައި ޓްރަމްޕްގެ މައްޗަށް 34 ދައުވާއެއް ސާބިތުވެފައިވާއިރު، މިއީ ހުކުމް އިއްވުން ފަސްކުރި ތިންވަނަ ފަހަރެވެ. މީގެ ކުރިން މިދިޔަ މަހުގެ 18 އަށާއި ޖުލައި 11 އަށް ވެސް ހުކުމް އިއްވުން ތާވަލުކުރި ނަމަވެސް ފަސްކޮށްފައިވެއެވެ.
ޓްރަމްޕްގެ މައްޗަށް ކޮށްފައިވާ ދައުވާގައި ވަނީ، 2016 ވަނަ އަހަރުގެ ރިޔާސީ އިންތިޚާބަށް ކުޑަ ދުވަސްކޮޅަކަށްވެފައި އޮއްވައި، ކެމްޕޭނަށް ގެއްލުންވެދާނެ ކަމަށް ބަލައި، ނަހަމަ ގުޅުންތަކެއް ފޮރުވުމަށް އަންހެނަކަށް ފައިސާ ދެއްވި ކަމަށެވެ. ކުށް ސާބިތުވާ ކަމަށް ކަނޑައެޅުމާ އެކު، ޓްރަމްޕް ވަނީ މި ޝަރީއަތަކީ ސިޔާސީ ބޮޑު އޮޅުވާލުމެއްގެ ގޮތުގައި ތުހުމަތު ކުރައްވައިފައެވެ.