ފަލަސްތީނުގެ އުތުރުގެ ސަރަހައްދެއްގައި އިޒްރޭލުން ދިން ދެ ހަމަލާއެއްގައި 13 ކުޑަކުދިންނާއެކު ޖުމްލަ 30 މީހަކު ޝަހީދުވެފައިވާ ކަމަށް ޣައްޒާގެ މަދަނީ ދިފާއީ އިދާރާއިން މިއަދު ހާމަކޮށްފިއެވެ.
މަދަނީ ދިފާއީ އިދާރާއިން ބުނެފައިވާ ގޮތުގައި ޣައްޒާގެ އުތުރުގެ ޖަބާލިއާގެ ގެއަކަށް އާދީއްތަ ދުވަހުގެ ފަތިހު ދިން ފުރަތަމަ ހަމަލާގައި 13 ކުޑަކުދިންނާއެކު މަދުވެގެން 25 މީހުން ޝަހީދުވެފައިވެއެވެ. އަދި މި ހަމަލާގައި 30 އަށްވުރެ ގިނަ މީހުން ޒަޚަމްވެފައިވާ ކަމަށްވެސް އެ އިދާރާއިން ބުނެފައިވެއެވެ.
އިތުރު ހަމަލާއެއްގައި ޣައްޒާ ސިޓީގެ ސަބްރާ އަވަށަށް އިޒްރޭލުން ދިން ހަމަލާއެއްގައި ފަސް މީހަކު މަރުވެފައިވާ ކަމަށާއި، އެތައް ބަޔަކު ގެއްލިފައިވާ ކަމަށް މަދަނީ ދިފާއީ އިދާރާއިން ބުނެފައިވެއެވެ. އަދި އާންމުންގެ އެތައް ބަޔަކު އިމާރާތްތަކުގެ ވެއްޓިފައިވާ ބައިތަކުގެ ދަށުގައި ތާށިވެފައި ތިބި ކަމަށްވެސް އެ އިދާރާއިން ފާހަގަކޮށްފައިވެއެވެ.
މިދިޔަ މަހުގެ ހަ ވަނަ ދުވަހުން ފެށިގެން އިޒްރޭލުގެ އަސްކަރިއްޔާއިން ދަނީ ޣައްޒާގެ އުތުރުގެ ޖަބާލިއާ ހިމެނޭ ސަރަހައްދުތަކަށް ވައިގެ މަގުންނާއި އެއްގަމު މަގުން ހަމަލާތައް ދެމުންނެވެ. އިޒްރޭލުން ބުނެފައިވަނީ މިއީ ހަމާސްގެ ހަނގުރާމަވެރިން އަލުން އެ ސަރަހައްދުގައި ޖަމާވުން ހުއްޓުވުމަށް ދޭ ހަމަލާތަކެއް ކަމަށެވެ.
މިދިޔަ އަހަރުގެ އޮކްޓޫބަރު މަހުގެ ހަތް ވަނަ ދުވަހު ހަމާސްއިން އިޒްރޭލަށް ދިން ހަމަލާތަކާ ގުޅިގެން އިޒްރޭލުން ދޭން ފެށި ހަމަލާތަކުގައި މިހާތަނަށް ފަލަސްތީނުގެ 43،552 މީހަކު ޝަހީދުކޮށްލާފައިވާކަން ފާހަގަކުރެވެއެވެ.