އިސްރާއީލުން ހިފާފައިވާ ފަލަސްތީނުގެ ބިންތަކުން އިސްރާއީލުން ފޭބުމަށާއި، އެއީ ސުލްހަ ގާއިމުކުރުމަށް ކަނޑައަޅަންޖެހޭ ޝަރުތެއް ކަމަށް އަރަބި އަދި މުސްލިމު ލީޑަރުން ގޮވާލައްވައިފިއެވެ. މި ގޮވާލުން އައިސްފައިވަނީ ސަޢުދީ އަރަބިއާގެ ވެރިރަށް ރިޔާދުގައި ހޯމަ ދުވަހު ބޭއްވުނު ބައްދަލުވުމެއްގައެވެ.
އަރަބި ލީގާއި އޮގަނައިޒޭޝަން އޮފް އިސްލާމިކް ކޯޕަރޭޝަނުން އިންތިޒާމްކޮށްގެން ބޭއްވި މި ބައްދަލުވުމަކީ އިސްރާއީލުގެ އަނިޔާވެރިކަން ކުށްވެރިކޮށް ގައުމުތަކުން އެއްތަންވެ ފުޅާ ދާއިރާއެއްގައި މަޝްވަރާކުޝްވަރާކުރި ފުރަތަމަ ފަހަރެވެ. ސަމިޓްގައި ބައިވެރިވި 57 އަރަބި ގައުމުގެ ލީޑަރުން ވަނީ އިރުމަތީ ގުދުސް ފަލަސްތީނުގެ ވެރިރަށަށް ހަދައި، ފަލަސްތީނުގެ މިނިވަން ދައުލަތެއް ގާއިމުކުރުމަށް ގޮވާލާފައެވެ.
އަދި މި މަގުސަދު ހާސިލްކުރުމަށް، ވަކި ފިޔަވަޅުތަކާއި ޓައިމްލައިންތަކާއެކު ބައިނަލްއަގްވާމީ ގޮތުން ސްޕޮންސަރ ކުރާ ޕްލޭނެއް އެކުލަވާލައި ތަންފީޒުކުރަން ފަށަން ޖެހޭ ކަމަށްވެސް ލީޑަރުން ވަނީ ބުނެފައެވެ.
ހަމާސްއިން ވަނީ އަރަބި އަދި މުސްލިމު ގައުމުތަކުގެ މި ހުށަހެޅުންތައް ހަގީގަތަކަށް ހެދުމަށް އަމަލީ މަސައްކަތްކުރުމަށް ގޮވާލައިފައެވެ. ހަމާސްއިން ނެރުނު ބަޔާނުގައި ބުނެފައިވަނީ ގުދުސަކީ ފަލަސްތީނުގެ ވެރިރަށް ކަމަށް ކަނޑައަޅައި، ފަލަސްތީނުގައި މިނިވަން ދައުލަތެއް ގާއިމްކުރުމަށްޓަކައި އިސްރާއީލުން ޣައްޒާގެ ރައްޔިތުންނާ ދެކޮޅަށް ކުރާ އަނިޔާވެރިކަމާއި ނަސްލު ނައްތާލުލު ނައްތާލުން ހުއްޓުވުމަށް މަޖުބޫރު ކުރުމަށް އިތުރު އަވަސް މަސައްކަތްތަކާއި އަމަލީ ހައްލުތަކެއް ހޯދަން ޖެހޭކަމަށެވެ.
މިދިޔަ އަހަރުގެ އޮކްޓޫބަރު 7 ވަނަ ދުވަހުން ފެށިގެން އިސްރާއީލުން ޣައްޒާއަށް ދޭންފެށި ހަމަލާތަކުގައި މިހާތަނަށް 43،600 އަށްވުރެ ގިނަ މީހުން ވަނީ ޝަހީދުކޮށްލާފައެވެ. އިސްރާއީލުގެ މި އަނިޔާވެރި ހަމަލާތައް ހުއްޓުވުމަށް ބައިނަލްއަގްވާމީ މުޖުތަމަޢުން އަޅަމުންދާ ފިޔަވަޅުތައް އިތުރަށް ހަރުދަނާކުރުމަށް ގިނަ ފަރާތްތަކުން ގޮވާލަމުންދެއެވެ.