ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީ (241 ކޮމިޓީ) އިން އަންގާރަ ދުވަހުގެ ބައްދަލުވުމަށް އިޒްރޭލު ޕާސްޕޯޓުގައި ރާއްޖެއަށް އެތެރެނުވެވޭ ގޮތް ހެދުމަށް ހުށަހެޅިފައިވާ ގާނޫނީ އިސްލާހާ މެދު ގޮތެއް ނިންމުމުގެ މައްސަލަ އެޖެންޑާކޮށްފިއެވެ.
މި އިސްލާހު މަޖިލީހަށް ހުށަހެޅުއްވީ އިދިކޮޅު އެމްޑީޕީގެ ގަލޮޅު ދެކުނު ދާއިރާގެ މެންބަރު މީކާއިލް އަހްމަދު ނަސީމެވެ. އިސްލާހުގެ މަގުސަދަކީ އިޒްރޭލުން ފަލަސްތީނުގެ ދަރިފަސްކޮޅު ނައްތާލުމަށް ހިންގަމުންގެންދާ ގަތުލުއާންމާ ދެކޮޅަށް ރާއްޖެއިން ފިޔަވަޅު އެޅުމެވެ.
241 ކޮމިޓީގެ ނައިބު މުގައްރިރު އިބްރާހީމް ފަލާހް ވިދާޅުވީ އަންގާރަ ދުވަހުގެ ބައްދަލުވުމުގައި މި އިސްލާހާ މެދު ގޮތެއް ނިންމާނެ ދުވަހެއް ކަނޑައަޅާނެ ކަމަށެވެ. އަދި އިސްލާހު ދިރާސާކުރާއިރު ކަމާ ގުޅޭ އިދާރާތަކުގެ ބޭފުޅުން ކޮމިޓީއަށް ހާޒިރުކޮށް ހިޔާލު ހޯދާނެ ކަމަށްވެސް ވިދާޅުވިއެވެ.
ރައީސް ޑރ. މުހައްމަދު މުއިއްޒުގެ ކެބިނެޓުން މިއަހަރުގެ ޖޫން 2 ވަނަ ދުވަހު ވަނީ އިޒުރޭލުގެ ޕާސްޕޯޓްގައި ރާއްޖެއަށް އެތެރެ ނުވެވޭ ގޮތް ހެދުމަށް އިމިގްރޭޝަން ގާނޫނު އިސްލާހު ކުރަން ނިންމާފައެވެ. މިއީ އިޒްރޭލުގެ ޕާސްޕޯޓްގައި ރާއްޖެއަށް އެއްވެސް ބަޔަކަށް އެތެރެވުން މަނާކުރުމަށް ކެބިނެޓުން ގޮތެއް ނިންމި ފުރަތަމަ ފަހަރެވެ.
ފަލާހް ވިދާޅުވީ ރައީސް މުއިއްޒަކީ ފަލަސްތީން ރައްޔިތުންގެ ހައްގުގައި މިއަދު އެންމެ ބޮޑަށް އަޑުއުފުއްލަވަމުން ގެންދަވާ އެއް ބޭފުޅާ ކަމަށްވާތީ ސަރުކާރާއި މަޖިލިސް އޮތީ މި ބިލްގެ މަސައްކަތް ކުރިއަށް ގެންދާ ގޮތަށް ކަމަށެވެ.