ބޭންކް އޮފް މޯލްޑިވްސް (ބީއެމްއެލް) އިން ހެވީ ލޯޑް މޯލްޑިވްސް ޕްރައިވެޓް ލިމިޓެޑްގެ ތިން ރަށެއް ލޯނު ނުދެއްކުމުގެ ސަބަބުން ވިއްކާލަން ނިންމައިފި އެވެ.
ރައްޔިތުންގެ މަޖިލީހުގެ ކުރީގެ ނައިބު ރައީސް މޫސާ މަނިކު (ރީކޯ) ގެ ކުންފުންޏެއް ކަމަށްވާ ހެވީ ލޯޑުން 11 މިލިއަން ޑޮލަރު (170 މިލިއަން ރުފިޔާ) ގެ ލޯނެއް ނެގި އިރު، އެ ލޯނު ނުދައްކައި އެބަހުއްޓެވެ.
ވިއްކަން ހަމަޖެހިފައިވާ ރަށްތަކުގެ ތެރޭގައި ލ އަތޮޅު ފަރެސް އައިލެންޑާއި ކުޑަ ފަރެސް އައިލެންޑާއި ބޮޑު ހުރާ ހިމެނެ އެވެ. ފަރެސް އައިލެންޑާއި ކުޑަ ފަރެސްގައި ހިންގާ ރަހާ ރިސޯޓުގައި 100 ބީޗް ވިލާގެ އިތުރުން ވޯޓާ ސްޕޯޓްސް، ޑައިވިން އަދި ސްޕާގެ ވަސީލަތްތައް ހުރެ އެވެ. ބޮޑު ހުރާ އަކީ ދަނޑުވެރިކަމަށް ބޭނުންކުރާ ރަށެކެވެ. މި ރަށްތަކުގެ ހެޑް ލީސްގެ މުއްދަތު 2064 ވަނަ އަހަރު ހަމަވާނެ އެވެ.
ބީއެމްއެލް އިން ވަނީ އެރަށްތައް ވިއްކާލުމަށް ދެ އޮޕްޝަނެއް ދީފަ އެވެ. ފުރަތަމަ އޮޕްޝަނުގައިވާ ގޮތުން ތިން ރަށް އެއްކޮށް ގަތުމަށް ހުށަހަޅަންޖެހޭ އެންމެ ކުޑަ އަގަކީ 23.2 މިލިއަން ޑޮލަރު (355 މިލިއަން ރުފިޔާ) އެވެ. ދެވަނަ އޮޕްޝަނުގައިވާ ގޮތުން ލ.ފަރެސް އާއި ކުޑަ ފަރެސް އަދި ބޮޑުހުރާ ވަކިން ގަނެވިދާނެ އެވެ. އެގޮތަށް ގަތުމަށް ވެސް ހުށަހެޅޭނެ އެންމެ ކުޑަ އަގަކީ 23.2 މިލިއަން ޑޮލަރެވެ.
މި ކަމަށް ޝައުގުވެރިވާ ފަރާތްތަކުން މިމަހުގެ 28 ވަނަ ދުވަހުގެ ކުރިން އެކްސްޕްރެޝަން އޮފް އިންޓްރެސްޓް ހުށަހެޅުމަށް ވަނީ އެދިފައެވެ.