އެމެރިކާގެ ރިޔާސީ އިންތިޚާބަށް ނުފޫޒު ފޯރުވަން މަސައްކަތްކުރާ ކަމަށް ތުހުމަތުކުރެވި، ރަޝިޔާ ސަރުކާރުގެ ފަންޑިންގ އާއެކު ހިންގާ އާރްޓީ ނިއުސްގެ އިސް އެޑިޓަރުންނާ ދެކޮޅަށް އެމެރިކާ ސަރުކާރުން ދަތިކުރުމުގެ ފިޔަވަޅުތަކެއް އަޅައިފިއެވެ.
އެމެރިކާގެ ޓްރެޜަރީ ޑިޕާޓްމަންޓުން ފިޔަވަޅު އަޅާފައިވާ 10 ފަރާތުގެ ތެރޭގައި އާރްޓީގެ އެޑިޓަރ-އިން-ޗީފް މާގަރިޓާ ސިމޮނޮވްނާ ސިމޮނިއަން އާއި ޑެޕިއުޓީ އެޑިޓަރ އެލިޒަވެޓާ ޔޫރިއެވްނާ ބްރޮޑްސްކައިއާ ހިމެނެއެވެ. މީގެ އިތުރުން ދެ މުއައްސަސާއަކާ ދެކޮޅަށްވެސް ފިޔަވަޅު އަޅާފައިވެއެވެ.
ޓްރެޜަރީ ސެކްރެޓަރީ ޖެނެޓް ޔެލެން ވިދާޅުވި ގޮތުގައި، މިއީ ދައުލަތުގެ ސްޕޮންސަރޝިޕްގެ ދަށުން ހަރަކާތްތެރިވާ ފަރާތްތަކުން ރައްޔިތުންގެ އިތުބާރު ގެއްލޭފަދަ ޢަމަލުތަކަށް ޖަވާބުދާރީ ކުރުވުމަށް އެމެރިކާ ސަރުކާރުން ކުރަމުންދާ މަސައްކަތްތަކުގެ ހެއްކެކެވެ. އަދި ޑިމޮކްރެޓިކް އަސާސްތަކާއި އިންތިޚާބީ ނިޒާމުތަކުގެ ނަޒާހަތްތެރިކަން ރައްކާތެރިކުރުމަށް ކުރާ މަސައްކަތުގައި ޓްރެޜަރީން ފަހަތަށް ނުޖެހޭނެކަމަށް އޭނާ ވިދާޅުވިއެވެ.
އެމެރިކާގެ އެޓަރނީ ޖެނެރަލް މެރިކް ގާލަންޑް ވިދާޅުވީ، މަނީ ލޯންޑަރިންގ އަދި ފޮރިން އޭޖެންޓްސް ރެޖިސްޓްރޭޝަން އެކްޓާ ޚިލާފުވުމުގެ ކުށުގެ ދަޢުވާ އާރްޓީގެ މުވައްޒަފެއްގެ މައްޗަށް ނިއު ޔޯކުގައި އުފުލާފައިވާ ކަމަށެވެ. އަދި ރަޝިޔާއިން އެމެރިކާގެ ބައެއް ކުންފުނިތަކާއި އިންފްލުއެންސަރުންނާއެކު އެ ޤައުމަށް ފައިދާވާ ގޮތަށް ކޮންޓެންޓް އުފެއްދުމަށް އެއްބަސްވުންތަކެއް ހަދާފައިވާ ކަމަށް ތުހުމަތުކުރެވޭ ކަމަށްވެސް އޭނާ ވިދާޅުވިއެވެ.އެމެރިކާގެ މި ތުހުމަތުތަކަށް އާރްޓީ ނިއުސްއިން ވަނީ އިންކާރުކޮށްފައެވެ.
މި ފިޔަވަޅުތަކުގެ ސަބަބުން، އެމެރިކާގައި ހުރި އާރްޓީ ނިއުސްގެ އެސެޓްތައް ފްރީޒްކުރެވި، އެމެރިކާގެ ފަރާތްތަކާއެކު އެ ކުންފުނިން މުޢާމަލާތް ކުރުން މަނާވެގެންދާނެއެވެ. މިއީ އެމެރިކާގެ ޑިމޮކްރެޓިކް މުއައްސަސާތަކާއި އިންތިޚާބީ ނިޒާމު ރައްކާތެރިކުރުމަށް އެޅުނު މުހިންމު ފިޔަވަޅެއްގެ ގޮތުގައި ސަރުކާރުން ދެކެއެވެ.
މި މައްސަލައިގައި އިތުރު ތަޙުޤީޤުތައް ކުރިއަށްދާނެ ކަމަށާއި، ބޭރުގެ ނުފޫޒުތަކުން އެމެރިކާގެ އިންތިޚާބީ ނިޒާމު ސަލާމަތްކުރުމަށް އިތުރު ފިޔަވަޅުތައް އަޅަމުންދާނެ ކަމަށް އެމެރިކާގެ އިސް ވެރިން ބުނެފައިވެއެވެ. މި ކަމާ ގުޅިގެން ބައިނަލްއަޤްވާމީ މުޖުތަމަޢުގެ ސަމާލުކަން ވަނީ އިތުރުވެފައެވެ.
ޔޫސުފް ޔޫޝަޢު