ރާއްޖޭގައި އިންވެސްޓް ކުރުމުގައި އަމަލުކުރާނެ ގޮތް ބަޔާންކޮށް އެކުލަވާލާފައިވާ އާ ފޮރިން އިންވެސްޓްމެންޓް ބިލް، ރައީސް ޑރ. މުހައްމަދު މުއިއްޒު މިއަދު ތަސްދީގުކުރައްވައިފިއެވެ.
މިއީ 45 އަހަރުވެފައި އޮތް ފޮރިން އިންވެސްޓްމެންޓް ގާނޫނު އާކޮށްގެން، އިންވެސްޓަރުންނަށް މިހާރަށް ވުރެ ފަހި ފުރުސަތުތަކެއް ގާނޫނީ ގޮތުން ލިބޭނެ ގޮތަށް އެކުލަވައިލާފައިވާ ގާނޫނެކެވެ.
އާ ގާނޫނުގެ ދަށުން:
– ރާއްޖޭގައި އެކި ދާއިރާތަކުން ހުރި ވިޔަފާރީގެ ފުރުސަތުތަކާ ގުޅޭ ދިރާސާތަކާއި ފީޒިބިލިޓީ ރިޕޯޓުތައް ތައްޔާރުކުރެވޭނެ
– ބޭރުގެ އިންވެސްޓަރުންނަށް ރާއްޖޭގައި އިންވެސްޓްކުރެވޭނީ ގާނޫނުގައި ކަނޑައަޅާ ދާއިރާތަކުގައި
– އިންވެސްޓްކުރުމަށް ހުއްދަ ހޯދަންޖެހޭނެ
– އިންވެސްޓަރުން އިންވެސްޓް ކުރާނެ ދާއިރާތައް ކަނޑައަޅާނީ ވަޒީރުންގެ މަޖިލީހުގެ މަޝްވަރާއާ އެކު
– އިންވެސްޓްކުރާ ފަރާތްތަކުން ލައިސެންސް ހޯދަންޖެހޭނެ
– އިންވެސްޓްކުރުމުގެ ހުއްދައަށް އެދޭ ހުށަހެޅުންތަކަށް 30 ދުވަހުގެ ތެރޭގައި ގޮތެއް ނިންމަންޖެހޭނެ
ގާނޫނާ ޚިލާފުވާ ފަރާތްތަކަށް ޖޫރިމަނާ ކުރެވޭނެ ގޮތް:
– ހުއްދަ ދީފައިވާ ވިޔަފާރިއެއް ނޫން އެހެން ވިޔަފާރިއެއް ކުރާނަމަ: މުޅި ވިޔަފާރީގެ އަގުގެ 30 ޕަސެންޓަށް ވުރެ ބޮޑު ނޫން އަދަދަކުން
– ސައްހަ ނޫން މައުލޫމާތު ހުށަހަޅާފައިވާ ކަން ސާބިތުވެއްޖެނަމަ: އެއް ލައްކަ އާއި އެއް މިލިއަން ރުފިޔާއާ ދެމެދުގެ އަދަދަކުން
މި އާ ގާނޫނުގެ ސަބަބުން ރާއްޖޭގައި ބޭރުގެ އިންވެސްޓްމަންޓްތައް އިތުރުވެ، އިޤްތިޞާދީ ކުރިއެރުން ލިބޭނެކަމަށް ބެލެވެއެވެ.