ޓެލެގްރާމް އެޕްލިކޭޝަންގެ ވެރިޔާ ޕަވެލް ޑްރޯވް (39) ފްރާންސުން ހައްޔަރުކޮށް، އޭނާގެ މައްޗަށް ދައުވާ އުފުލައިފި އެވެ. ޑްރޯވް ހައްޔަރުކުރީ ޓެލެގްރާމްގައި ކުށުގެ އަމަލުތައް ހިންގުމަށް ފުރުސަތު ލިބޭ މައްސަލައިގަ އެވެ.
ޑްރޯވް ހައްޔަރުކުރިތާ ހަތަރު ދުވަސް ފަހުން އޭނާގެ މައްޗަށް ދައުވާތައް އުފުލައި، ފަސް މިލިއަން ޔޫރޯގެ ކަފާލާތެއްގެ ދަށުން މިނިވަންކޮށްފައިވެ އެވެ. ނަމަވެސް އޭނާ ފްރާންސުން ބޭރަށް ދިއުން ވަނީ މަނާކޮށްފައެވެ. އަދި ހަފްތާއަކު ދެ ފަހަރު ޕޮލިހަށް ރިޕޯޓްކުރަން ޖެހޭނެ އެވެ.
ޑްރޯވްގެ މައްޗަށް އުފުލި ދައުވާތަކުގެ ތެރޭގައި ހިމެނެނީ:
– ޓެލްގްރާމް ޕްލެޓްފޯމްގައި ކުށުގެ އަމަލުތައް ހިންގުމަށް ފުރުސަތު ދިނުން
– ކަމާބެހޭ އިދާރާތަކުން އެދޭ ލިޔެކިޔުންތައް ހާމަނުކުރުން
– ކުޑަކުދިންގެ ބަރަހަނާ މަންޒަރުތައް ފެތުރުމަށް ފުރުސަތު ދިނުން
– ޑްރަގް ޓްރެފިކިން އާއި މަނީ ލޯންޑަރިން ހިންގުމަށް ޓެލެގްރާމް ބޭނުންކުރުން
މީގެ އިތުރުން، ކުރީގެ ބައިވެރިޔަކަށް ލިބިފައިވާ ފިރިހެން ދަރިއަކާ މެދު އަނިޔާވެރި އަމަލުތަކެއް ހިންގި ކަމަށް ބުނާ މައްސަލައެއް ވެސް ހިމެނެ އެވެ.
ޑްރޯވްގެ ވަކީލު ވިދާޅުވެފައިވަނީ ޓެލެގްރާމްގައި އެހެން ބަޔަކު ހިންގާ އަމަލެއްގެ ޒިންމާ ޑްރޯވް އުފުލަން ޖެހުމަކީ އެކަށީގެންވާ ކަމެއް ނޫން ކަމަށެވެ. އަދި ޓެލެގްރާމް ހިންގަނީ ޔޫރަޕިއަން ޔުނިއަންގެ ޑިޖިޓަލް ޓެކްނޮލޮޖީ މިންގަނޑުތަކާ އެއްގޮތަށް ކަމަށް ވެސް ވިދާޅުވި އެވެ.
ފޯބްސް މަޖައްލާއިން އަންދާޒާކޮށްފައިވާ ގޮތުގައި ޑްރޯވްގެ މިލްކިއްޔާތު 15.5 ބިލިއަން ޑޮލަރަށް އަރައެވެ. އޭނާ އަމިއްލައަށް ޕްރޮމޯޓްކުރަނީ ބަނގުރާ ނުބޯ، އަޚްލާޤު ރަނގަޅު މީހެއްގެ ގޮތުގައެވެ.