ސްވިޑެންގައި މިދިޔަ އަހަރު ބޭއްވި މުޒާހަރާތަކުގައި ޚަތިމްތަކެއް އަންދާލި މައްސަލައިގައި ދެ މީހެއްގެ މައްޗަށް ދަޢުވާ އުފުލާފައިވާ ކަމަށް އެ ގައުމުގެ ކޯޓަކުން ބުދަ ދުވަހު ހާމަކޮށްފިއެވެ.
ދަޢުވާ އުފުލާފައިވަނީ ސަލްވާން މުމީކު އާއި ސަލްވާން ނަޖޭމް ގެ މައްޗަށެވެ. މި ދެ މީހުން ވަކިވަކިން ހަތަރު ފަހަރެއްގެ މަތިން ”ނަސްލީ ނުވަތަ ގައުމީ ޖަމާޢަތަކާ ދެކޮޅަށް ހަރަކާތްތެރިވުމުގެ ކުށްތައް“ ހިންގާފައިވާ ކަމަށް ކޯޓުން ބުނެފައިވެއެވެ.
ސީނިއާ ޕްރޮސެކިއުޓަރު އަނާ ހަންކިއޯ ވިދާޅުވީ މި ދެ މީހުންގެ މައްޗަށް ދަޢުވާ ކުރަނީ ހަތަރު ފަހަރަށް މުސްލިމުންނަށް ފުރައްސާރަކޮށް ޤުރުއާނާމެދު ކަންތައް ކުރި ގޮތުންކަމަށެވެ. އަދި މި މައްސަލައިގައި މައިގަނޑު ހެކިތަކަކީ ވީޑިއޯ ރެކޯޑިންތައް ކަމަށްވެސް އޭނާ ވިދާޅުވިއެވެ.
މިދިޔަ އަހަރު ސްޓޮކްހޯމްގެ މައި މިސްކިތު ކުރިމަތީގައި ޚަތިމްތަކެއް އަންދާލާފައިވަނީ ޢީދުލް އަޟްޙާ ދުވަހުއެވެ. މި ޢަމަލު ހިންގާފައިވަނީ ފުލުހުންގެ ހުއްދައާއެކު ބޭއްވި މުޒާހަރާއެއްގައެވެ. މި ކަމާ ގުޅިގެން އިސްލާމީ ގިނަ ގައުމުތަކުން ވަނީ އެކަން ކުށްވެރިކޮށްފައެވެ.