އެތުލެޓިކޯ މެޑްރިޑްގެ ކުޅުންތެރިއެއް ކަމުގައިވާ ސަމޫ އޮމޯޑިއޮން 16 މިލިއަން ޑޮލަރަށް ޕޯޓުގީޒް ކްލަބް ޕޯޓޯއަށް ބަދަލުވެއްޖެއެވެ. މި ޓްރާންސްފާ ވަނީ 2029 ގެ ނިޔަލަށް ކުރެވިފައެވެ.
ޗެލްސީން އޮމޯޑިއޮންގެ ސޮއި ހޯދުމަށް 40 މިލިއަން ޑޮލަރު ހުށަހެޅި ނަމަވެސް، އޭނާ އިޚްތިޔާރުކުރީ ޕޯޓޯއަށް ބަދަލުވުމެވެ. މިދިޔަ ސީޒަނުގައި ރެއާލް ސޮސިއެޑާޑަށް ލޯނު އެއްބަސްވުމުގެ ދަށުން ކުޅެ، ފާހަގަކޮށްލެވޭ ފަދަ ޕަފޯމަންސްތަކެއް ދެއްކި އޮމޯޑިއޮންގެ ޓްރާންސްފާއާ ގުޅޭގޮތުން ޗެލްސީ އާއި އެތުލެޓިކޯއާ ދެމެދު ގިނަ މަޝްވަރާތަކެއް ކުރެވުނެވެ.
މި ވަގުތު ޕޯޓޯ އަށް އޮތީ އޮމޯޑިއޮންގެ ކޮންޓްރެކްޓްގެ 50 ޕަސެންޓެވެ. އަންނަ އަހަރު ޖުލައި މަހު އިތުރު 15 ޕަސެންޓް އަދި 2026 ގެ ޖުލައިގައި އިތުރު 15 ޕަސެންޓް ޕޯޓޯއަށް މިލްކުކުރެވޭނެއެވެ. މި މުއްދަތުގެ ތެރޭގައި ޕޯޓޯއިން އެތުލެޓިކޯއަށް ޖުމުލަ 10 މިލިއަން ޑޮލަރު ދައްކަން ޖެހޭނެއެވެ.
ޕޯޓޯއިން އޮމޯޑިއޮން އެހެން ކްލަބަކަށް ވިއްކާލައިފިނަމަ، އެ ޓްރާންސްފާއިން ލިބޭ ފައިސާގެ 20 ޕަސެންޓް އެތުލެޓިކޯއަށް ލިބޭނެއެވެ. މިހާރު ޕޯޓޯއިން އޮމޯޑިއޮންގެ ޓްރާންސްފާ ފީ 100 މިލިއަން ޑޮލަރުގައި ކަނޑައަޅާފައިވާކަން ފާހަގަކޮށްލެވެއެވެ.