ޣައްޒާގެ މިސްކިތެއްގައި އިޒުރޭލު ސިފައިން ގުރުއާން އަންދާ މަންޒަރު ދައްކުވައިދޭ ވީޑިއޯއެއް ގަތަރުގެ އަލްޖަޒީރާ ނެޓްވޯކުން ވަނީ އާންމުކޮށްފައެވެ. މި ވީޑިއޯ ލިބިފައިވަނީ ޣައްޒާއަށް ވެއްޓިފައި އޮތް އިޒުރޭލުގެ ޑްރޯނަކުން ކަމަށް އަލްޖަޒީރާއިން ބުނެފައިވެއެވެ.
ވީޑިއޯގައި ދައްކާ ގޮތުން، ހުޅަނގު ޣައްޒާގެ ބަލީ ސާލިހް މިސްކިތަށް އިޒުރޭލު ސިފައިން ވަދެ، މުސްހަފެއް ނަގައި ގަނޑުތައް ވީދައި އަންދާ މަންޒަރު ފެނެއެވެ. މީގެ އިތުރުން، ޚާން ޔޫނިސްގެ 96 އަހަރުވެފައިވާ މިސްކިތަކަށް އިޒުރޭލު ސިފައިން ވަދެ އިމާރާތަށާއި ތަކެއްޗަށް ގެއްލުންދޭ މަންޒަރުވެސް އަލްޖަޒީރާއިން ދައްކާފައިވެއެވެ.
ގުރުއާން އެންދުމަކީ މުސްލިމުންނަށް ވަރަށް ބޮޑު އިހާނެތިކަމެކެވެ. މިފަދަ ޢަމަލުތަކުގެ ސަބަބުން ކުރީގައިވެސް ބައެއް ހުޅަނގުގެ ޤައުމުތަކުގައި ހަމަނުޖެހުންތައް ހިނގާފައިވެއެވެ.
މި ހާދިސާއާ ގުޅޭގޮތުން އިޒުރޭލު ސަރުކާރުން ނުވަތަ އަސްކަރިއްޔާއިން އަދި އެއްވެސް ބަޔާނެއް ނެރެފައެއް ނުވެއެވެ. އިޒުރޭލުން ގިނަފަހަރު މަސައްކަތް ކުރަނީ އަސްކަރިއްޔާގައި ހިންގާ މިފަދަ ޢަމަލުތައް ފޮރުވުމަށެވެ.
ޣައްޒާ ހަނގުރާމައަށް 10 މަސް ފުރިފައިވާއިރު، އިޒުރޭލުގެ ހަމަލާތަކުގައި 40,200 އަށްވުރެ ގިނަ މީހުން މަރުވެފައިވާ ކަމަށް ވަނީ ރިޕޯޓުކުރެވިފައެވެ. މިސްކިތްތަކާއި، ސްކޫލުތަކާއި، ރެފިއުޖީ ކޭމްޕްތަކަށް ވެސް އިޒުރޭލުން ވަނީ ހަމަލާދީފައެވެ. މި ހަމަލާތަކުގެ ސަބަބުން ޣައްޒާއަށް ވަރަށް ބޮޑެތި ގެއްލުންތައް ވަނީ ލިބިފައެވެ.